ہم ایسے بے سروساماں جہانِ امکاں میں ہزار سال بھی رہتے، تو بے نشاں رہتے

زمیں پہ بوجھ تھے، کیا زیرِ آسماں رہتے
یہ کائنات پرائی تھی، ہم کہاں رہتے

ہم ایسے بے سروساماں جہانِ امکاں میں
ہزار سال بھی رہتے، تو بے نشاں رہتے

جو ہم لہو کی شہادت بھی پیش کر دیتے
جو بدگماں تھے، بہرحال بدگماں رہتے

کوئی فریبِ وفا ہی میں مبتلا رکھتا !
تو اُس کے جور و جفا پر بھی شادماں رہتے

پُکارتا جو کوئی سُوئے دار بھی دل سے
تو نقدِ جان لئے، سر بہ کف رَواں رہتے

کسی کے ایک اشارے پہ جل بُجھے ہوتے
بَلا سے بعد کے منظر دُھواں دُھواں رہتے

مگر، یہ سود و زیاں کا جہان تھا عاجزؔ
یہاں خلوص کے سجدے بھی رائیگاں رہتے