میں اس کو جوڑنے بیٹھا تھا خود بھی ٹوٹ گیا جو ایک شخص مجھے پارہ پارہ ہاتھ لگا

 میں بجھ گیا تو اچانک تمہارا ہاتھ لگا

میں جل اُٹھوں گا قسم سے دوبارہ ہاتھ لگا

 غریقِ چشمِ فسوں ساز مکت ہوتے نہیں 

 میں پورا ڈوب گیا تو کنارہ ہاتھ لگا

 وگرنہ تم پہ بھی مفہومِ دل لگی کھلتا

تمہارے بخت کہ مجھ سا بچارہ ہاتھ لگا

میں اس کو جوڑنے بیٹھا تھا خود بھی ٹوٹ گیا

جو ایک شخص مجھے پارہ پارہ ہاتھ لگا

مجھے وہ آگ میسر ہوئی تو ٹھنڈی تھی 

بجھا چکا تھا کوئی جب شرارہ ہاتھ لگا 

تو سامنے ہے مرے، اور میں پھر بھی زندہ ہوں

مجھے یقین تو آئے...... خدارا ہاتھ لگا

گلاب دے کے کوئی ساتھ لے گیا اس کو

 اسے میں ہار چکا تو ستارہ ہاتھ لگا

مجھ ایسا دشتِ سخن میں تمام عمر پھرا

غزل ملی...... نہ کوئی نثر پارہ ہاتھ لگا

آزاد حسین آزاد