اک آرزو ہے بقایا مری خدا کی طرف
سو قبلہ رو ہوں مگر دل ہے کربلا کی طرف
حُسین تجھ سے محبت پہ فیصلہ ہو گا
ہے کون کون حقیقت میں مصطفی کی طرف
میں کربلا میں نہیں تھا مگر غلام تو ہوں
فرشتو! مجھ کو گنو ابن _ مرتضی کی طرف
طویل رستہ، مصائب، رداۓ پاکیزہ
میں رو کے دیکھتا ہوں عرشِ کبریا کی طرف
چل آ حسین کے حق میں صدا بلند کریں
چل آ صدا سے کریں ابتدا بقا کی طرف
نثار محمود تاثیر
پن پوسٹ
تیمور حسن تیمور
تجھے زندگی کا شعور تھا' ترا کیا بنا ؟
تو خموش کیوں ہے مجھے بتا' ترا کیا بنا ؟
نئی منزلوں کی تلاش تھی' سو بچھڑ گئے
میں بچھڑ کے تجھ سے بھٹک گیا ، ترا کیا بنا ؟
مجھے عِلم تھا کہ شکست میرا نصیب ہے
تو اُمیدوار تھا جیت کا ، ترا کیا بنا ؟
میں مقابلے میں شریک تھا' فقط اس لیے
کوئی آ کے مجھ سے یہ پوچھتا ، ترا کیا بنا ؟
جو نصیب سے تری جنگ تھی' وہ مِری بھی تھی
میں تو کام یاب نہ ہو سکا' ترا کیا بنا؟
تجھے دیکھ کر تو مجھے لگا تھا کہ خوش ہے تو
ترے بولنے سے پتا چلا ، ترا کیا بنا
میں الگ تھا ' اس لیے مجھ کو اِس کی سزا ملی
تو بھی دوسروں سے تھا کچھ جدا ، ترا کیا بنا ؟
