تجھے تلوار سے رغبت مجھے ہے ڈھال کا سودا تِری تائید سے واعظ مِرا انکار تگڑا ہے

جہاں لاغر مکیں ہیں اور چوکیدار تگڑا ہے
سمجھ لیجے ضرورت سے وہاں پندار تگڑا ہے

رعایا کے لئے یکساں مگر باہم تقابل میں
امیرِ شہر سے اِس شہر کا سالار تگڑا ہے

تجھے تلوار سے رغبت مجھے ہے ڈھال کا سودا
تِری تائید سے واعظ مِرا انکار تگڑا ہے

گلوں کی شوخیاں دیدہ وروں کو کھینچ لیتی ہیں
اگرچہ پھول کی نسبت بظاہر خار تگڑا ہے

مِرے چارہ گرو تمکو اجازت ہے سعی کر لو
مگر یہ آگہی دے دُوں مِرا آزار تگڑا ہے

مِرے حصے میں کوئی سِین ہی آیا نہیں سائیں
اِسی اِک بات پر خوش ہُوں مِرا کردار تگڑا ہے