وقت بتلاتی نہیں یاد دلاتی ہے مجھے آپ کی یہ گھڑی سرکار مجھے کاٹتی ہے

اک تو یہ ہجر کی تلوار مجھے کاٹتی ہے
میری سگریٹ بھی لگاتار مجھے کاٹتی ہے

ایک چھت ہے جو ٹپکتی نہیں ہے روتی ہے
ایک بوسیدہ سی دیوار مجھے کاٹتی ہے

شب کا سنّاٹا شدید اس پہ گھڑی کی ٹک ٹک
ایک آواز کی تکرار مجھے کاٹتی ہے

مجھ میں کیا ہے جو نکالے گی مرے اندر سے
سو یہ تنہائی تو بے کار مجھے کاٹتی ہے

وقت بتلاتی نہیں یاد دلاتی ہے مجھے
آپ کی یہ گھڑی سرکار مجھے کاٹتی ہے

اس لیے تُجھ سے ذرا فاصلہ رکھّا مرے دوست ڈھیل گھٹ جائے تو پھر ڈور گلا کاٹتی ہے

اُس کی خاموش روی اور تو کیا کاٹتی ہے
رات بھر بین پہ رکھتی ہے گلا کاٹتی ہے

اس لیے تُجھ سے ذرا فاصلہ رکھّا مرے دوست
ڈھیل گھٹ جائے تو پھر ڈور گلا کاٹتی ہے

صرف اتنا ہے،مری اُس سے رفاقت کا وجود
ایک دیوار ہے جو در کا خلا کاٹتی ہے

ہم قفس زاد کہاں جاتے ہیں پنجرے کے سوا
حَبس کو چھوڑ کے جائیں تو ہوا کاٹتی ہے

نیم تاریک سے ماحول میں وحشت کا وفور
پھر تِری پیاس بھی اندر سے گھڑا کاٹتی ہے

طویل قد سے نہیں آتا بڑا پن کبھی بھی عاطف انسان کو اوصاف میں کردار میں بڑا ھونا چاہئیے

پیمانہ جو بھی ھو بس بھرا ھونا چاہئیے
اور اھل ظرف کے سامنے پڑا ھونا چاہئیے

وہ ڈالیں نہ ڈالیں نگاہ الفت انکی مرضی ھے
دیوانہ ان کی راہ میں کھڑا ھونا چاہئیے

کون کہتا ھے کہ میں سلامت پار چڑھوں
دریا میں جوش اور کچا گھڑا ھونا چاہئیے

وہی چاہئیے کی گردان ھونی چاہئیے لب پر
عاشق کو اپنی ضد پہ اڑا ھونا چاہئیے

تعلق خراب کرتے ہیں سب پرانے قصے
جو مردہ جہاں گڑا ھے وھاں گڑا ھونا چاہئیے

طویل قد سے نہیں آتا بڑا پن کبھی بھی عاطف
انسان کو اوصاف میں کردار میں بڑا ھونا چاہئیے

تُو مرا ساتھ نبھا جسم سے گمراہ نہ کر یہ کھلونے مجھے بازار سے مِل جاتے ہیں

حوصلے اس لیے بنیاد سے ہل جاتے ہیں
عشق کی جنگ میں بازو نہیں دل جاتے ہیں

تُو مرا ساتھ نبھا جسم سے گمراہ نہ کر
یہ کھلونے مجھے بازار سے مِل جاتے ہیں

زخم وہ پھول ہیں جن کو نہیں درکار بہار
سخت موسم ہو تو یہ اور بھی کھل جاتے ہیں

دھوپ میں پیڑ کا کردار نبھانے والے
نم پکڑ جائیں تو پھر صورت ِ گِل جاتے ہیں

جب تلک درد ہو سینے میں زباں بولتی ہے
زخم سلتے ہیں تو پھر ہونٹ بھی سل جاتے ہیں

فقیر قول نبھاتا ہے پریم کرتا ہے فقیر کوئی کرامت دِکھانے والا نہیں

جو اِسم و جسم کو باہم نِبھانے والا نہیں
میں ایسے عشق پہ ایمان لانے والا نہیں

میں پاؤں دھو کے پئیوں یار بن کے جو آئے
منافقوں کو تو میں منہ لگا نے والا نہیں

نزول کر مرے سینے پہ اے جمال ِ شدید
تری قسم میں ترا خوف کھانے والا نہیں

بس اِتنا جان لے اے پُر کشش کے دل تجھ سے
بہل تو سکتا ہے پر تجھ پہ آنے والا نہیں

یہ میری آنکھ میں بھڑکے تو پھر ہٹاؤں گا
ابھی میں آگ سے نظریں ہٹانے والا نہیں

تجھے کسی نے غلط کہہ دیا میرے بارے
نہیں میاں میں دِلوں کو دُکھانے والا نہیں

ہے ایک رمز جو تجھ پر عیاں نہیں کرنی
ہے ایک شعر جو تجھ کو سنانے والا نہیں

فقیر قول نبھاتا ہے پریم کرتا ہے
فقیر کوئی کرامت دِکھانے والا نہیں

سن اے قبیلہء ِ کوفی دِلاں مُکرر سن
علی کبھی بھی حزیمت اُٹھانے والا نہیں

علی زریون