شکریہ آپ نے اوقات بڑھا دی لیکن بعض اوقات یہ اوقات ہمیں کاٹتی ہے

رات بھر درد بھری رات ہمیں کاٹتی ہے
وہ ہے تنہائی کہ برسات ہمیں کاٹتی ہے

تم جوکہتے ہو کہ بس رات گئی بات گئی
تم کو معلوم ہے یہ بات ہمیں کاٹتی ہے

اس نے سمجھا ہی نہیں وصل کا مطلب کیا ہے
اجنبی بن کے ملاقات ہمیں کاٹتی ہے

ہم نے اشکوں سے یہ دیکھا تھا عبارت ہوتے 
چاند تاروں سے بھری رات ہمیں کاٹتی ہے

شکریہ آپ نے اوقات بڑھا دی لیکن
بعض اوقات یہ اوقات ہمیں کاٹتی ہے

وہ جو کہتے تھے، کرو بات کہ خوشبو بکھرے
اب وہ کہتے ہیں، تری بات ہمیں کاٹتی ہے

پوچھنے آتے ہیں حالات کسی غیر کے ساتھ
اور یہ صورتِ حالات ہمیں کاٹتی ہے
(صغیر احمد صغیر).

دونوں ہاتھوں سے لگاتی ہے وہ قوسین کی حد طیش میں آتے ہی پھر اپنا لکھا کاٹتی ہے

پسِ زندانِ انا قیدِ جفا کاٹتی ہے
زندگی روشنی ہے اور خلا کاٹتی ہے

دونوں ہاتھوں سے لگاتی ہے وہ قوسین کی حد
طیش میں آتے ہی پھر اپنا لکھا کاٹتی ہے

تُو نے اس دشت کا  زنداں ابھی دیکھا ہی نہیں
دن کو جلتا ہے بدن شب کو ہوا کاٹتی ہے

کیسے  ناکردہ گناہوں میں اٹھائی گئی ہے
کیسے کرموں کا کیا خلقِ خدا کاٹتی ہے

زخمِ ناسور سے اٹھتی ہے جونہی باسِ ہوس
تب طوائف  اسے ڈھکنے کو ردا کاٹتی ہے

ہم نے تو دیکھا فقط نجمی ہے خستہ دیوار
کبھی سوچا ہی نہیں کون ہے؟ کیا کاٹتی ہے؟

*سیّد نجم الحسن نجمی فرام کہوٹ*

ایک ہی شخص مصیبت میں مرے ساتھ رہا اور وہ شخص کوئی اور نہیں تھا میں تھا

وہ جو بے یارو مددگار کہیں تھا میں تھا
دُور اک شخص کو یہ پھر بھی یقیں تھا، میں تھا

ایک ہی شخص مصیبت میں مرے ساتھ رہا
اور وہ شخص کوئی اور نہیں تھا میں تھا

پورے گاوں میں اگر سب سے الگ تھی، وہ تھی
اُن دنوں گاوں میں جو سب سے حسیں تھا میں تھا

جب محبت میں وظیفے بھی لگا کرتے تھے
یاد ہے! کون یہاں تخت نشیں تھا؟ میں تھا

میں نہیں مانتا میں تجھ سے بچھڑ سکتا ہوں
تُو جو کہتا ہے میں اُس وقت وہیں تھا، میں تھا؟

آپ اس گھر کی تباہی پہ ہیں افسردہ کیوں؟
جانتے ہیں کہ یہاں کون مکیں تھا؟ میں تھا

مجھ پہ مجھ سے بھی زیادہ اسے حق تھا ساحر
اُس سے بڑھ کر بھی کوئی اُس کے قریں تھا، میں تھا
          جہانزیب ساحر