بن کے سائل یوں زمانے کے پھرو گے کب تک کیا کوئی اور بھی سنتا ہے خدا سے پہلے

لذت وصل کہاں درد جفا سے پہلے
چاندنی شب میں کہیں زلف سیہ سے پہلے

میں نے بت خانہ میں دیکھیں ہیں بہت سجدہ کناں
وہ تو جھک جاتے ہیں فورا ہی ندا سے پہلے

بن کے سائل یوں زمانے کے پھرو گے کب تک
کیا کوئی اور بھی سنتا ہے خدا سے پہلے

اب نہ دیکھیں گے گلستاں میں کبھی دور بہار
اب قفس سے کہاں آزادی قضا سے پہلے

سو برس بھی نہ رہی زندگی انسان کا حق
موت آجاتی ہے جینے کی ادا سے پہلے

نہیں دفتر میں میرے عشق و محبت کا گناہ
کیوں بھلا دار پہ چڑھ جاؤں خطا سے پہلے

ناخدا اب تو سفینہ کو بھنور میں لے چل
دیکھیں ہم بھی تو انا کیا ہے فنا سے پہلے

یاد اغیار سے زخموں کو کریدو نہ افق
آہ بھی نکلی تو پھیلے گی ہوا سے پہلے
اشفاق غوری افق