ہم ہیں سوکھے ہوئے تالاب پہ بیٹھے ہوئے ہنس جو تعلق کو نبھاتے ہوئے مر جاتے ہیں

دشت میں پیاس بجھاتے ہوئے مر جاتے ہیں
ہم پرندے کہیں جاتے ہوئے مر جاتے ہیں

ہم ہیں سوکھے ہوئے تالاب پہ بیٹھے ہوئے ہنس
جو تعلق کو نبھاتے ہوئے مر جاتے ہیں

گھر پہنچتا ہے کوئی اور ہمارے جیسا
ہم ترے شہر سے جاتے ہوئے مر جاتے ہیں

کس طرح لوگ چلے جاتے ہیں اٹھ کر چپ چاپ
ہم تو یہ دھیان میں لاتے ہوئے مر جاتے ہیں

ان کے بھی قتل کا الزام ہمارے سر ہے
جو ہمیں زہر پلاتے ہوئے مر جاتے ہیں

یہ محبت کی کہانی نہیں مرتی لیکن
لوگ کردار نبھاتے ہوئے مر جاتے ہیں

ہم ہیں وہ ٹوٹی ہوئی کشتیوں والے تابشؔ
جو کناروں کو ملاتے ہوئے مر جاتے ہیں

عباس تابش

سارے گناہ اب مِرے دامن میں ڈال کر خوش ہو رہا ہے شہر میں پگڑی اُچھال کر

سارے گناہ  اب  مِرے  دامن  میں  ڈال کر
خوش ہو رہا ہے شہر میں پگڑی اُچھال کر

اُس شہر  کے  امیر  کو  مر  جانا  چاہیئے
بچے  سُلائے  ماں  جہاں  پتھر   اُبال   کر 

پامال  میّتوں  پہ  تو  بنتا  ہے  مرثیہ
مجھ  کو گلے لگا مِرے دُکھ  کا  ملال کر

سچ   بولنے  پہ  کُفر  کا  فتویٰ  لگا  میاں
لے   آ   کتاب  سے  کوئی  آیت  نکال  کر

ٹکڑوں پہ پلنے والے مجھے  بھونکنے  لگے
اب سوچتا ہوں کیا ملا کُتوں کو پال کر

پاؤں جکڑ  رہی  تھی مِرے  اب  وہ فاحشہ
دُنیا   پہ   تھوک   آیا  ہوں  گالی  نکال  کر 

کاسے میں لے کے پھرتا ہے دُنیا یہ بادشہ
آتا  نہیں  یقین  تو  بابا  سوال  کر

یہ تتلیوں کے روپ میں بھنورے ہیں اِس لئے
رکھنا بدن کی خوشبو کو گڑیا سنبھال کر

میثم علی آغا

اس سے آگے ہے گھٹن وحشت ہے کافی دوستا اس سے آگے دوستا اب ساتھ میرے تو نا آ

اس سے آگے ہے گھٹن وحشت ہے کافی دوستا
اس سے آگے دوستا اب ساتھ میرے تو نا آ

میں سراسر عشق ہوں ہارنے والا نہیں
انجام سب ہوں جانتا مجھ کو قِصے نا سنا

تم بہت مجبور تھے حالات نا تھے سازگار
یہ کہانی میرے پیارے مجھ کو پھر سے نا سنا

اس پہ دھر تہمت کوئی اور اپنے دامن کو بچا
یہ سبق ہے بزدلی کا مجھ کو ایسا نا پڑھا

داستانِ غم کو سن ہمدردیاں پر پاس رکھ
آنسووں کو لگام دے ان کی قیمت نا گھٹا

محمد واصف اسلم

دل تجھے ناز ہے جس شخص کی دلداری پر​ دیکھ اب وہ بھی اتر آیا اداکاری پر​

دل تجھے ناز ہے جس شخص کی دلداری پر​
دیکھ اب وہ بھی اتر آیا اداکاری پر​

میں نے دشمن کو جگایا تو بہت تھا لیکن​
احتجاجاً نہیں جاگا مری بیداری پر​

آدمی آدمی کو کھائے چلا جاتا ہے​
کچھ تو تحقیق کرو اس نئی بیماری پر​

کبھی اس جرم پہ سر کاٹ دئے جاتے تھے​
اب تو انعام دیا جاتا ہے غدّاری پر​

تیری قربت کا نشہ ٹوٹ رہا ہے مجھ میں​
اس قدر سہل نہ ہو تو مری دشواری پر​

مجھ میں یوں تازہ ملاقات کے موسم جاگے​
آئینہ ہنسنے لگا ہے مری تیاری پر

کوئی دیکھے بھرے بازار کی ویرانی کو​
کچھ نہ کچھ مفت ہے ہر شے کی خریداری پر​

بس یہی وقت ہے سچ منہ سے نکل جانے دو​
لوگ اتر آئے ہیں ظالم کی طرف داری پر​

سلیم کوثر

میں سوچ ہی رہا تھا پری ایسی ہوتی ہے پھر اک حسین لڑکی میرے پاس آ گئی

جب سے مرے قریب سے وہ ذات کیا گئی
مجھ کو اکیلا پن یہ اداسی بھی کھا گئی

میں سوچ ہی رہا تھا پری ایسی ہوتی ہے
پھر اک حسین لڑکی میرے پاس آ گئی

سب کھیل جانتا ہوں میں اندھا نہیں حضور
یہ زندگی بھی مجھ کو بہت کچھ دکھا گئی

منظر بہت عجیب تھا دلچسپ تھا مگر
اک چڑیا ایک پیڑ کو باتیں سنا گئی

مجھ کو کوئی بیماری نہیں ہے مرے عزیز
شاید  کسی کی بات سرہانے  لگا گئی

میں روؤں تو در و دیوار مجھ پر ہنسنے لگتے ہیں ہنسوں تو میرے اندر جانے کیا کیا ٹوٹ جاتا ہے

مرے وہم و گماں سے بھی زیادہ ٹوٹ جاتا ہے
یہ دل اپنی حدوں میں رہ کے اتنا ٹوٹ جاتا ہے

میں روؤں تو در و دیوار مجھ پر ہنسنے لگتے ہیں
ہنسوں تو میرے اندر جانے کیا کیا ٹوٹ جاتا ہے

میں جس لمحے کی خواہش میں سفر کرتا ہوں صدیوں کا
کہیں پاؤں تلے آ کر وہ لمحہ ٹوٹ جاتا ہے

مرے خوابوں کی بستی سے جنازے اٹھتے جاتے ہیں
مری آنکھیں جسے چھو لیں وہ سپنا ٹوٹ جاتا ہے

نہ جانے کتنی مدت سے ہے دل میں یہ عمل جاری
ذرا سی ٹھیس لگتی ہے ذرا سا ٹوٹ جاتا ہے

دل ناداں ہماری تو نمو ہی نا مکمل تھی
تو حیرت کیا جو بنتے ہی ارادہ ٹوٹ جاتا ہے

مقدر میں مرے ساگر شکست و ریخت اتنی ہے
میں جس کو اپنا کہہ دوں وہ ستارا ٹوٹ جاتا ہے

سلیم ساگر

تیرے منسوب گداگر نے یہیں رہنا ہے پھٹ بھی جائے تو،،،، ،،گریبان کہاں جاتا ہے

راستے ہیں بڑے سنسان کہاں جاتا ہے
رات گہری ہے مری مان کہاں جاتا ہے

ریل کے شور مچاتے ہوئے انجن کے طفیل
رونے والوں کی طرف دھیان کہاں جاتا ہے

تیرے منسوب گداگر نے یہیں رہنا ہے
پھٹ بھی جائے تو،،،، ،،گریبان کہاں جاتا ہے

آخرِ عمر بھی اس وصل کی خواہش پہ نثار
جان جاتی ہے پہ ارمان کہاں جاتا ہے

کون خاموش طبیعت سا نکل آتا ہے
تجھ سے مل کر مرا ہیجان،،،،،کہاں جاتا ہے

اس سرائے سے نکل جانے کے رستے کم ہیں
دل میں ٹھہرا ہوا مہمان کہاں جاتا ہے

بعد مرنے کے کہاں جاتی ہیں روحیں آزاد
کاش معلوم ہو انسان کہاں جاتا ہے

آزاد حسین آزاد

تو سنگ دل سہی قاتل سہی شفیق سہی قسم خدا کی کوئی تجھ سا دوسرا نہ ملا

بتوں کے بعد خدا کا بھی کچھ پتا نہ ملا
ملا رہے تھے مگر ٹھیک سلسلہ نہ ملا

وہ کہہ رہے تھے کہ تشریح مدعا کیجے
تلاش کی توہمیں کوئی مدعا نہ ملا

جناب شیخ یہ کیا ماجرا ہوا آخر
سنا ہے آپکو کعبے میں بھی خدا نہ ملا

گماں یہ تھا کہ تھجے ڈھونڈ ہی کے دم لیں گے
حال یہ ہے کہ اپنا بھی کچھ پتا نہ ملا

تو سنگ دل سہی قاتل سہی شفیق سہی
قسم خدا کی کوئی تجھ سا دوسرا نہ ملا

وہ راہ دیر و حرم کہ راہ مے خانہ
بغیر صدق کسی کو وہ دل ربا نہ ملا

قسم خدا کی عدم جام زہر پی لیں گے
بہ اتفاق اگر آج دل ربا نہ ملا___!!

تم جو چڑھتے ہو نظر پر تو تمہارے ہوتے سب حسینانِ جہاں دل سے اُتر جاتے ہیں

موےٓ مژگاں سے ترے سینکڑوں مر جاتے ہیں
یہی نشتر تو رگ جاں میں اتر جاتے ہیں

حرم و دیر ہیں عشاق کے مشتاق مگر
تیرے کوچے سے ادھر یہ نہ اُدھر جاتے ہیں

کوچہٓ یار میں اول تو گزر مشکل ہے
جو گزرتے ہیں زمانے سے گزر جاتے ہیں

شمع ساں جلتے ہیں جو بزم محبت میں ترے
نام روشن وہی آفاق میں کر جاتے ہیں

اثر آب بقا خاک رہ عشق میں ہے
وہی زندہ ہیں یہاں آ کے جو مر جاتے ہیں

تم جو چڑھتے ہو نظر پر تو تمہارے ہوتے
سب حسینانِ جہاں دل سے اُتر جاتے ہیں

زاہدو تم کو جناں ہم کو در یار پسند
خیر جاوٓ تم اُدھر کو ہم ادھر جاتے ہیں

زندے کیا اہل عدم کو بھی پھنسا لاتے ہیں
زلف کے بال اگر تابہ کمر جاتے ہیں

کیا اثر نام علیؑ میں ہے کہ لیتے ہی امیرؔ
کام بگڑے ہوئے جتنے ہیں سنور جاتے ہیں

امیر مینائی

ہجر بھی لے ہی لیا، دشت کے آزار کے ساتھ بحث کیا کرتا میں البیلے دکاں دار کے ساتھ

ہجر بھی لے ہی لیا، دشت کے آزار کے ساتھ
بحث کیا کرتا میں البیلے دکاں دار کے ساتھ

کون کمرے میں کِھلا باغ اٹھا لایا ہے
کس نے تصویر لگائی ہے یہ دیوار کے ساتھ

آخری عمر میں کیا عشق سے ریٹائر ہوں
درد کوئی تو رہے صبح کے اخبار کے ساتھ

وقت سے بھاپ کےانجن کا تقابل کیسا
میں قدم کیسے ملاؤں تری رفتار کے ساتھ

رعب ایسا تھا کہ دشمن بھی مقابل نہ ہوئے
سانپ بل کھاتے رہے خوف سے، دستار کے ساتھ

ہم سگِ کوچہ۶ِ دلدار کہیں جاتے نہیں
بیٹھے رہتے ہیں ادب سے تری دیوار کے ساتھ

آزاد حسین آزاد

لوگ تو لوگ تھے توقیر مری کیا کرتے میرا سایہ بھی یہاں مجھ سے گریزاں نکلا

جب شکستہ مرے دل سے بھی گریباں نکلا
میں غم عشق تھا سمجھا غم دوراں نکلا

لوگ تو لوگ تھے توقیر مری کیا کرتے
میرا سایہ بھی یہاں مجھ سے گریزاں نکلا

میں نے جس شخص کو ہر حال میں خوش دیکھا تھا
وہ تمنا کے سرابوں کا بیاباں نکلا

پھر ترے سچ میں بھی اخلاص بھلا کیا ہو گا
تری ہر بات میں جب جھوٹ مری جاں نکلا

آپ اپنی حقیقت پہ ندامت ہے مجھے
خود غرض اتنا مرے دور کا انساں نکلا
کلیم احسان بٹ

آپ محلوں میں رہا کرتے ہو ہم سڑکوں پر اپنی قسمت کا ستارہ بھی کہاں ملتا ہے

بے سہارا ہوں سہارا بھی کہاں ملتا ہے
ڈوبتا ہوں تو کنارہ بھی کہاں ملتا ہے

آپ محلوں میں رہا کرتے ہو ہم سڑکوں پر
اپنی قسمت کا ستارہ بھی کہاں ملتا ہے

یاد ہے تم کو رہا کرتے تھے ہم ساتھ کبھی
وہ حسیں دن وہ نظارہ بھی کہاں ملتا ہے

لوگ اب مجھ کو ستاتے ہیں کوئی بات نہیں
اب وہی قرب تمارا بھی کہاں ملتا ہے

دوست دیتے تھے کبھی ہم کو سہارا ثاقب
ہائے وہ آج سہارا بھی کہاں ملتا ہے

نادر ثاقب

میں پھول بھیجوں گا جس جگہ سے ملی محبت علی کا نعرہ لگاؤں گا جو تڑی ملے گی

یہ  قید  خانہ   ملے  گا  یا  ہتھکڑی   ملے  گی
جو جتنا  بولا  اسے  سزا  بھی  بڑی  ملے  گی

میں  اژدھوں  سے   لڑوں  گا  پوری  بہادری  سے
خدائے موسیٰ مجھے بھی ویسی چھڑی ملے گی؟

اُسے  ہرا  کر  بھی  تم  کبھی  نہ  ہرا  سکو  گے
مقابلے  میں کبھی  جو عورت  کھڑی  ملے  گی

میں پھول بھیجوں گا جس جگہ سے ملی محبت
علی  کا  نعرہ   لگاؤں   گا  جو   تڑی   ملے   گی

یہاں کے لوگوں نے خواب دیکھے ہیں جاگتے میں
جسے بھی  دیکھو وہ آنکھ  تم کو  گڑی  ملے گی

وہ مجھ سے ہو کر خدا کے رستے پہ جا رہا تھا
اسے  پتہ  تھا  کڑی  سے  کیسے  کڑی  ملے  گی

ازل  سے  جس میں  فقط برا  وقت چل  رہا  ہے
مری  کلائی  میں تم کو  ایسی  گھڑی  ملے  گی

گلاب  کیسے  لگیں  گے  خوشبو  کہاں   سے  آئے
ہمارے  گملوں  میں  صرف  مٹی  پڑی  ملے  گی

مجھے تو چھوڑو تم آ کے باغوں کا حال دیکھو
بِنا  تمہارے  ہر  ایک   ٹہنی  جھڑی   ملے   گی

میں اپنے پیاروں میں آج ایسے سکون میں ہوں
پتنگ  بیری  میں  جس طرح سے  اَڑی  ملے گی

                    ندیم راجہ

تو سنا تیری مسافت کی کہانی کیا ہے میرے رستے میں تو ہر گام پہ خم آتے ہیں

یہ جو چہروں پہ لئے گرد الم آتے ہیں
یہ تمہارے ہی پشیمان کرم آتے ہیں

اتنا کھل کر بھی نہ رو جسم کی بستی کو بچا
بارشیں کم ہوں تو سیلاب بھی کم آتے ہیں

تو سنا تیری مسافت کی کہانی کیا ہے
میرے رستے میں تو ہر گام پہ خم آتے ہیں

خول چہروں پہ چڑھانے نہیں آتے ہم کو
گاؤں کے لوگ ہیں ہم شہر میں کم آتے ہیں

وہ تو بیدلؔ کوئی سوکھا ہوا پتا ہوگا
تیرے آنگن میں کہاں ان کے قدم آتے ہیں

وہ، جن کو مانگنا بھی پڑے ، اور لوگ ہیں ہم لوگ آسماں کی طرف دیکھتے ہیں بس

بندوق تانتے ہیں، ہدف دیکھتے ہیں، بس!
اپنا ہے بے ضرر سا شغف، دیکھتے ہیں بس!

وہ، جن کو مانگنا بھی پڑے ، اور لوگ ہیں
ہم لوگ آسماں کی طرف دیکھتے ہیں بس

تو دیکھ بس خلا میں معلق یہ کائنات
اس سے پرے تو اہلِ شرف دیکھتے ہیں بس

اپنی جگہ پتہ ہے سو مسجد میں جا کے ہم
جوتوں کے آس پاس کی صف دیکھتے ہیں بس

مجھ کو بہ غور دیکھ کے کہنے لگا فقیر
ایسے مریض، شاہِ نجف دیکھتے ہیں بس

گھڑیاں تو بیچ دی تھیں، برے وقت میں، تمام
اب عادتاً قمیص کے کف دیکھتے ہیں بس

سنتے ہیں خواب میں، "طلع البدر" کی صدا
اور چند پاک ہاتھوں میں دف دیکھتے ہیں بس

جب کوئی پوچھے، "خود کو کہاں دیکھتے ہیں کل؟"
ہم اپنی خاک، خاک سے لف دیکھتے ہیں بس

عمیر نجمی

چھوڑو طبیب یار اسے لاو ڈھونڈ کے ہوتا ہے کیسے ٹھیک یہ بیمار دیکھنا

وہ چاہتا تو ہے مجھے مسمار دیکھنا
ممکن نہیں مگر پس دیوار دیکھنا

اب اس کے انتظار میں رک ہی گئی گھڑی
وہ آئے گا تو وقت کی رفتار دیکھنا

کانٹوں کا احتساب تو کرنے ہو چل پڑے
کچھ پھولوں کا بھی دوستو کردار دیکھنا

جانے لگے ہو چھوڑ کے تو جاو خیر سے
واپس نہ مڑ کے پھر کبھی سرکار دیکھنا

چھوڑو طبیب یار اسے لاو ڈھونڈ کے
ہوتا ہے کیسے ٹھیک یہ بیمار دیکھنا

چپ دوستی کے نام پہ شہزاد ہوں کھڑا
دشمن جو آئے سامنے للکار دیکھنا
شہزاد جاوید