جاتی ہوئی میت دیکھ کے بھی واللہ تم اٹھ کے آ نہ سکے دو چار قدم تو دشمن بھی تکلیف گوارا کرتے ہیں

کب میرا نشیمن اہل چمن گلشن میں گوارا کرتے ہیں
غنچے اپنی آوازوں میں بجلی کو پکارا کرتے ہیں

اب نزع کا عالم ہے مجھ پر تم اپنی محبت واپس لو
جب کشتی ڈوبنے لگتی ہے تو بوجھ اتارا کرتے ہیں

جاتی ہوئی میت دیکھ کے بھی واللہ تم اٹھ کے آ نہ سکے
دو چار قدم تو دشمن بھی تکلیف گوارا کرتے ہیں

بے وجہ نہ جانے کیوں ضد ہے ان کو شب فرقت والوں سے
وہ رات بڑھا دینے کے لیے گیسو کو سنوارا کرتے ہیں

پونچھو نہ عرق رخساروں سے رنگینئ حسن کو بڑھنے دو
سنتے ہیں کہ شبنم کے قطرے پھولوں کو نکھارا کرتے ہیں

کچھ حسن و عشق میں فرق نہیں ہے بھی تو فقط رسوائی کا
تم ہو کہ گوارا کر نہ سکے ہم ہیں کہ گوارا کرتے ہیں

تاروں کی بہاروں میں بھی قمرؔ تم افسردہ سے رہتے ہو
پھولوں کو تو دیکھو کانٹوں میں ہنس ہنس کے گزارا کرتے ہیں

قمر جلالوی

کہتے ہیں عمر رفتہ کبھی لوٹتی نہیں جا مے کدے سے میری جوانی اٹھا کے لا

لہرا کے جھوم جھوم کے لا مسکرا کے لا
پھولوں کے رس میں چاند کی کرنیں ملا کے لا

کہتے ہیں عمر رفتہ کبھی لوٹتی نہیں
جا مے کدے سے میری جوانی اٹھا کے لا

ساغر شکن ہے شیخ بلا نوش کی نظر
شیشے کو زیر دامن رنگیں چھپا کے لا

کیوں جا رہی ہے روٹھ کے رنگینیٔ بہار
جا ایک مرتبہ اسے پھر ورغلا کے لا

دیکھی نہیں ہے تو نے کبھی زندگی کی لہر
اچھا تو جا عدمؔ کی صراحی اٹھا کے لا

۔۔۔۔۔
عبدالحمید عدم

روز الجھے ہوئے گیسو نہیں سلجھا کرتے روز پالی نہیں جاتی یہ وبالی وحشت

اشک اترے تو سرِ در ہی سجا لی وحشت
راستہ چھوڑ دیا، راہ میں پا لی وحشت

اب یہ سوچا کہ اکیلے نہیں رہنا میں نے
رونقِ دل کے لئے گھر ہی بلا لی وحشت

یہ بھی ہے سچ کہ کسی سے نہیں ڈرتا لیکن
آپ کے نام نے دل میں مرے ڈالی وحشت

دو مجھے ہجر میں چپ چاپ اذیت کا سبق
سیکھ لوں میں بھی محبت کی خیالی وحشت

ایک اک لمس جلاتا رہا لمحوں کا مجھے
ایک تو درد ہے، پھر رات کی کالی وحشت

ہم نے رہنے نہیں دینا کسی ہمسر کو خفا
آج دل آیا تو منت سے منا لی وحشت

فرق اتنا ہے کہ آتا نہیں اک پل کو یقیں
ہاں مگر تم نے گماں میں بھی بسا لی وحشت

روز الجھے ہوئے گیسو نہیں سلجھا کرتے
روز پالی نہیں جاتی یہ وبالی وحشت

آؤ آغازِ اذیت کے ہی چرچے کر لیں
یوں بھی تو ہوتی ہے انجام سے خالی وحشت

آسماں نے مجھے دھتکار نکالا باقی
اور جنت نے ہے دل میں مرے ڈالی وحشت

وجاہت باقی

شباب نام ہے دل کی شگفتہ کاری کا وہ کیا جوان رہے جس کا دل جواں نہ رہے

سیماب اکبر آبادی

رہیں گے چل کے کہیں اور اگر یہاں نہ رہے
بَلا سے اپنی جو آباد گُلِسْتان نہ رہے

ہم ایک لمحہ بھی خوش زیرِ آسماں نہ رہے
غنیمت اِس کوسَمَجْھیے کہ جاوداں نہ رہے

ہمیں تو خود چَمن آرائی کا سلیقہ ہے
جو ہم رہے توگُلِسْتاں میں باغباں نہ رہے

شباب نام ہے دل کی شگفتہ کاری کا
وہ کیا جوان رہے جس کا دل جواں نہ رہے

حرم میں، دَیروکلیسا میں، خانقاہوں میں
ہمارے عشق کے چرچے کہاں کہاں نہ رہے

کبھی کبھی، رہی وابستگی قفس سے بھی
رہے چمن میں تو پابندِ آشیاں نہ رہے

فضائے گل ہے نظر کش و مَن ہے دامن کش
کہاں رہے تِرا آوارہ سر، کہاں نہ رہے

بہار جن کے تبسّم میں مُسکراتی تھی
وہ گُلِسْتاں وہ جوانانِ گُلِسْتاں نہ رہے

خدا کے جاننے والے تو خیر کچھ تھے بھی
خدا کے ماننے والے بھی اب یہاں نہ رہے

ہمیں قفس سے کریں یاد پھر چمن والے
جب اور کوئی ہوا خواہِ آشیاں نہ رہے

کِیا بھی سجدہ تو دل سے کِیا نظر سے کِیا
خدا کا شُکر کہ ہم بارِ آستاں نہ رہے

ہے عصرِ نَو سے یہ اِک شرط انقلاب کے بعد
ہم اب رہیں جو زمیں پر تو آسماں نہ رہے

برائے راست تعلّق تھا جن کا منزل سے
وہ راستے نہ رہے اب وہ کارواں نہ رہے

ہَمِیں خرابِ ضعیفی نہیں ہوئے سیماب
ہمارے وقت کے اکثر حَسِیں جواں نہ رہے

غلط تو خیر محبت میں اور کیا ہوتا مگر یہ ہے کہ طبیعت درست ہو گئی ہے

سنبھل نہیں گئی حضرت !! درست ہو گئی ہے
بگڑ کے اور بھی حالت درست ہو گئی ہے

عجیب بات سُنی ہے خدا معاف کرے
کہ آں جناب کی صحبت درست ہو گئی ہے

خراب شے ہوا کرتی تھی کوئی دن پہلے
تجھے ملی ہے تو شہرت درست ہو گئی ہے

نجانے کون مخاطب ہے اِن دنوں تجھ سے
کوئی بھی ہو  ، مری لکنت درست ہو گئی ہے

غلط تو خیر محبت میں اور کیا ہوتا
مگر یہ ہے کہ طبیعت درست ہو گئی ہے

ابھی گیا ہے مجھے کوستے ہوئے کوئی
کہ اُس تئیں مری نیّت درست ہو گئی ہے

کھلا کہ اُس سے بچھڑنے کی دیر تھی جواد 
مری اِک اور بھی عادت درست ہو گئی ہے

جواد شیخ

جو تیرے ساتھ محبت تھی مر گئی ہے وہ مگر جو تجھ سے عقیدت ہے کم نہیں ہوتی

جہانزیب ساحر

خوشی بھی کس نے کہا وجہِ غم نہیں ہوتی
بتا وہ شام جو شامِ الم نہیں ہوتی

ہم اس جگہ پہ کرایے کے گھر میں رہتے ہیں
ہماری رائے کبھی محترم نہیں ہوتی

ترے خیال کے آتے ہی لوٹنے سے لگا
ہرایک چیز اداسی میں ضم نہیں ہوتی

جھکے ہوئے ہیں یہ سر تو کسی مصیبت میں
یہ اک فقیر کی گردن ہے خم نہیں ہوتی

جو تیرے ساتھ محبت تھی مر گئی ہے وہ
مگر جو تجھ سے عقیدت ہے کم نہیں ہوتی

میں اپنے دکھ میں برابر شریک ہوں لیکن
بس ایک مسئلہ ہے آنکھ نم نہیں ہوتی

بتا رہی ہیں پرندوں کی ہجرتیں ساحر
کوئی تباہی کبھی ایک دم نہیں ہوتی

اب زمانے میں کوئی اہلِ وفا ملتا نہیں کیا وفا بھی دفن کر دی میرے دفنانے کے ساتھ

قمر جلالوی

آہ بھر کے یاد کرتے ہو ہر افسانے کے ساتھ
تم نے کیوں کی تھی محبت ایسے دیوانے کے ساتھ
.
زلف پابندِ کشاکش کیوں ہوئی شانے کے ساتھ
ٹھوکریں زنجیر بھی کھاتی ہے دیوانے کے ساتھ
.
وہ ادا ساقی کی دیکھی مے چھلک جانے کے بعد
پڑ گئی چکر میں توبہ میری پیمانے کے ساتھ
.
آس بندھ کر ٹوٹ جاتی ہے مجھے رونا یہ ہے
آپ ہنس دیتے ہیں وعدے پر قسم کھانے کے بعد
.
بزمِ ساقی میں نظر نیچی کئے بیٹھا ہوں میں
تھک گئی ہے آنکھ پھرے پھرتے پیمانے کے ساتھ
.
یہ تو اے ظالم ہوا جاتا ہے دعوے کا ثبوت
تیرا انکارِ ستم محشر میں شرمانے کے ساتھ
.
حضرتِ ناصح نصیحت تو سر آنکھوں پر مگر
آپ بھی تو کچھ سمجھتے جائیں سمجھانے کے ساتھ
.
جب سے توبہ کی ہے ملتی ہی نہیں وہ صحبتیں
چھٹ گئے یارانِ میخانہ بھی میخانے کے ساتھ
.
اب زمانے میں کوئی اہلِ وفا ملتا نہیں
کیا وفا بھی دفن کر دی میرے دفنانے کے ساتھ
.
دشتِ محفل میں کسی کو ہم بھی دیکھ آئے ہیں کل
کچھ بگولے پھر رہے تھے تیرے دیوانے کے ساتھ
.
پھول پر رونق نہیں آتی بلا سبزہ قمر
حسن کی فطرت ہے خوش رہتا ہے بیگانے کے ساتھ

آدمی زاد ہیں دُنیا کے حسیں لیکن امیر یار لوگوں نے پری زاد بنا رکھا ہے

امیر مینائی۔
۔۔۔۔۔۔۔۔۔۔۔۔۔۔۔۔

وصل ھو جائے یہیں حشر  میں  کیا  رکھا  ہے
آج کی بات  کو  کیوں  کل  پہ  اُٹھا   رکھا  ہے

مُحتسِب پُوچھ نہ تُو شیشے میں کیا رکھا ہے
پارسائی   کا   لہُو   اِس  میں   بھرا  رکھا  ہے

کہتے   ہیں  آئے  جوانی   تو  یہ  چوری  نِکلے
میرے   جوبن  کو   لڑکپن  نے  چُرا   رکھا  ہے

اِس تغافُل میں بھی سرگرمِ سِتم وہ   آنکھیں
آپ تو سوتے  ہیں  فِتنوں  کو  جگا   رکھا  ہے

آدمی  زاد  ہیں   دُنیا  کے  حسیں  لیکن  امیر
یار    لوگوں    نے    پری    زاد   بنا  رکھا  ہے

مرض عشق جسے ہو اسے کیا یاد رہے نہ دوا یاد رہے اور نہ دعا یاد رہے

ابراہیم زوق

مرض عشق جسے ہو اسے کیا یاد رہے
نہ دوا یاد رہے اور نہ دعا یاد رہے

تم جسے یاد کرو پھر اسے کیا یاد رہے
نہ خدائی کی ہو پروا نہ خدا یاد رہے

لوٹتے سیکڑوں نخچیر ہیں کیا یاد رہے
چیر دو سینے میں دل کو کہ پتا یاد رہے

رات کا وعدہ ہے بندے سے اگر بندہ نواز
بند میں دے لو گرہ تا کہ ذرا یاد رہے

قاصد عاشق سودا زدہ کیا لائے جواب
جب نہ معلوم ہو گھر اور نہ پتا یاد رہے

دیکھ بھی لینا ہمیں راہ میں اور کیوں صاحب
ہم سے منہ پھیر کے جانا یہ بھلا یاد رہے

تیرے مدہوش سے کیا ہوش و خرد کی ہو امید
رات کا بھی نہ جسے کھایا ہوا یاد رہے

کشتۂ ناز کی گردن پہ چھری پھیرو جب
کاش اس وقت تمہیں نام خدا یاد رہے

خاک برباد نہ کرنا مری اس کوچے میں
تجھ سے کہہ دیتا ہوں میں باد صبا یاد رہے

گور تک آئے تو چھاتی پہ قدم بھی رکھ دو
کوئی بیدل ادھر آئے تو پتا یاد رہے

تیرا عاشق نہ ہو آسودہ بہ زیر طوبیٰ
خلد میں بھی ترے کوچے کی ہوا یاد رہے

باز آ جائیں جفا سے جو کبھی آپ تو پھر
یاد عاشق کو نہ کیجے گا بھلا یاد رہے

داغ دل پر مرے پھاہا نہیں ہے انگارا
چارہ گر لیجو نہ چٹکی سے اٹھا یاد رہے

زخم دل بولے مرے دل کے نمک خواروں سے
لو بھلا کچھ تو محبت کا مزا یاد رہے

حضرت عشق کے مکتب میں ہے تعلیم کچھ اور
یاں لکھا یاد رہے اور نہ پڑھا یاد رہے

گر حقیقت میں ہے رہنا تو نہ رکھ خود بینی
بھولے بندہ جو خودی کو تو خدا یاد رہے

عالم حسن خدائی ہے بتوں کی اے ذوقؔ
چل کے بت خانے میں بیٹھو کہ خدا یاد رہے

خالی اے چارہ گرو ہوں گے بہت مرہم داں پر مرے زخم نہیں ایسے کہ بھر جائیں گے

ابراہیم زوق

اب تو گھبرا کے یہ کہتے ہیں کہ مر جائیں گے
مر کے بھی چین نہ پایا تو کدھر جائیں گے

تم نے ٹھہرائی اگر غیر کے گھر جانے کی
تو ارادے یہاں کچھ اور ٹھہر جائیں گے

خالی اے چارہ گرو ہوں گے بہت مرہم داں
پر مرے زخم نہیں ایسے کہ بھر جائیں گے

پہنچیں گے رہ گزر یار تلک کیوں کر ہم
پہلے جب تک نہ دو عالم سے گزر جائیں گے

شعلۂ آہ کو بجلی کی طرح چمکاؤں
پر مجھے ڈر ہے کہ وہ دیکھ کے ڈر جائیں گے

ہم نہیں وہ جو کریں خون کا دعویٰ تجھ پر
بلکہ پوچھے گا خدا بھی تو مکر جائیں گے

سامنے چشم گہر بار کے کہہ دو دریا
چڑھ کے گر آئے تو نظروں سے اتر جائیں گے

لائے جو مست ہیں تربت پہ گلابی آنکھیں
اور اگر کچھ نہیں دو پھول تو دھر جائیں گے

ہم بھی دیکھیں گے کوئی اہل نظر ہے کہ نہیں
یاں سے جب ہم روش تیر نظر جائیں گے

ذوقؔ جو مدرسے کے بگڑے ہوئے ہیں ملا
ان کو مے خانے میں لے آؤ سنور جائیں گے

ہر ایک شہر کا معیار مختلف دیکھا کہیں پہ سر کہیں پگڑی کا احترام ہوا

آنس معین

عجب تلاش مسلسل کا اختتام ہوا
حصول رزق ہوا بھی تو زیر دام ہوا 

ہر ایک شہر کا معیار مختلف دیکھا
کہیں پہ سر کہیں پگڑی کا احترام ہوا

ذرا سی عمر عداوت کی لمبی فہرستیں
عجیب قرض وراثت میں میرے نام ہوا

نہ تھی زمین میں وسعت مری نظر جیسی
بدن تھکا بھی نہیں اور سفر تمام ہوا

ہم اپنے ساتھ لئے پھر رہے ہیں پچھتاوا
خیال لوٹ کے جانے کا گام گام ہوا

میرے اپنے اندر ایک بھنور تھا جس میں میرا سب کچھ ساتھ ہی میرے ڈوب گیا ہے

آنس معین

وہ کچھ گہری سوچ میں ایسے ڈوب گیا ہے
بیٹھے بیٹھے ندی کنارے ڈوب گیا ہے

آج کی رات نہ جانے کتنی لمبی ہوگی
آج کا سورج شام سے پہلے ڈوب گیا ہے

وہ جو پیاسا لگتا تھا سیلاب زدہ تھا
پانی پانی کہتے کہتے ڈوب گیا ہے

میرے اپنے اندر ایک بھنور تھا جس میں
میرا سب کچھ ساتھ ہی میرے ڈوب گیا ہے

شور تو یوں اٹھا تھا جیسے اک طوفاں ہو
سناٹے میں جانے کیسے ڈوب گیا ہے

آخری خواہش پوری کر کے جینا کیسا
آنسؔ بھی ساحل تک آ کے ڈوب گیا ہے

تھالی کے کچھ نوالے بچائے وگرنہ میں یاروں کی گردنوں پہ بھی تلوار کھینچتا

اقسان محبوب

ممکن ہے عین چوک میں اس بار کھینچتا
بیٹے کو زر نہ ملتا تو دستار کھینچتا

تھالی کے کچھ نوالے بچائے وگرنہ میں 
یاروں کی گردنوں پہ بھی تلوار کھینچتا

رحم آ گیا تھا چور پہ سرمایہ  دار کو
ورنہ غریب شہر کو بازار کھینچتا

غفلت سے مر رہا تھا پڑا نوجوان دوست
کیسے نہ ڈاکٹر سے میں گفتار کھینچتا

سب کو چنا گیا ہے محبت کے نام پر
یا رب مجھے بھی کوئی طلب گار کھینچتا

اچھا ہوا کہ ہوش کے ناخن لیۓ گئے
عجلت کا شر تو بیچ میں دیوار کھینچتا

بن کے سائل یوں زمانے کے پھرو گے کب تک کیا کوئی اور بھی سنتا ہے خدا سے پہلے

لذت وصل کہاں درد جفا سے پہلے
چاندنی شب میں کہیں زلف سیہ سے پہلے

میں نے بت خانہ میں دیکھیں ہیں بہت سجدہ کناں
وہ تو جھک جاتے ہیں فورا ہی ندا سے پہلے

بن کے سائل یوں زمانے کے پھرو گے کب تک
کیا کوئی اور بھی سنتا ہے خدا سے پہلے

اب نہ دیکھیں گے گلستاں میں کبھی دور بہار
اب قفس سے کہاں آزادی قضا سے پہلے

سو برس بھی نہ رہی زندگی انسان کا حق
موت آجاتی ہے جینے کی ادا سے پہلے

نہیں دفتر میں میرے عشق و محبت کا گناہ
کیوں بھلا دار پہ چڑھ جاؤں خطا سے پہلے

ناخدا اب تو سفینہ کو بھنور میں لے چل
دیکھیں ہم بھی تو انا کیا ہے فنا سے پہلے

یاد اغیار سے زخموں کو کریدو نہ افق
آہ بھی نکلی تو پھیلے گی ہوا سے پہلے
اشفاق غوری افق

مجھے وہ کل شب منا رہی تھی تو امی یہ کہہ کے مسکرائیں تم اپنا سیل فون چینج کر لو مجھے بھی آواز آ رہی ہے

آلِ عمر

یہ کیا معمہ ہے میری درویشی اس کی آنکھوں میں آ رہی ہے
میں جب سے اوجھل ہوا ہوں وہ مجھ کو ٹھیک سے دیکھ پا رہی ہے

میں سچ بتاؤں تو میں محبت کا اور لڑکی کا آدمی نئیں
شروع سے پہلی مجھ کو سُرمہ تو دوجی چونا لگا رہی ہے

یہ روز رونا بھی کون چاہے گا اور رونا بھی دوستی میں
پر آنسو پی پی کے میرے لہجے کی سالا شیرینی جا رہی ہے

وہ شاعرہ تو نہیں مگر جانتی ہے نظموں کا رزق کیا ہے
بہت ہی نازک ہے پر رلانے میں زور پورا لگا رہی ہے

مجھے وہ کل شب منا رہی تھی تو امی یہ کہہ کے مسکرائیں
تم اپنا سیل فون چینج کر لو مجھے بھی آواز آ رہی ہے

کمال یہ ہے عدم کو بھی ملے اعزاز کسی بھی اور کی دستار کو اُتارے بغیر

میں صاف صاف  یہ کہتا ہوں اِستعارے بغیر
مجھے بہشت بھی جانا نہیں تمہارے بغیر

 مِرا یہ فیصلہ ہے اور تم  یہ جانتے ہو
میں فیصلے نہیں کرتا ہوں  اِستخارے بغیر

 تو اُس کو  چاہئے جا کر دکان داری کرے
جو شخص چاہتا ہو  عشق  بھی خَسارے بغیر

 سنَد بھی چاہتے ہو اور اِمتحاں سے گُریز
سَحَر کی آرزو رکھتے ہو  شب گزارے بغیر

 میں اِس لئے بھی دعا پر یقین رکھتا ہوں
کہ تم بھی سُنتے نہیں ہو مِری،  پکارے بغیر

 وہ ماہ تاب ہے،  ملنا تو با وُضو ہو کر
وہ جاں نِکال بھی لیتا ہے جاں سے مارے بغیر

میں چاہتا ہوں کہ دونوں ہی جیت جائیں ہم
میں چاہتا ہوں یہی ہو کسی کے ہارے بغیر

 تو کیا یہ کم ہے کرامت، کہ جان لیتا ہوں
 رضائے یار کو میں یار  کے اِشارے بغیر 

پڑا جو دشت سے پالا تو پھر یہ یاد آیا
 کہ ایک شخص تھا دریا سا اور  کِنارے بغیر

کھڑا ہوں پاوں پہ جو میں تو تیری ستّاری
میں مُشتِ خاک ہوں مولا تِرے سہارے بغیر

کمال یہ  ہے عدم کو بھی ملے اعزاز
 کسی بھی اور کی دستار کو اُتارے بغیر

🩸میں دیوانہ ہوں میرے پاس محشر میں کھڑے رہنا نہ جانے میں کہوں کیا اور کیا پوچھے خدا مجھ سے

چنیدہ اشعار

جو تھا برتاؤ دنیا کا، وہی اُس نے کیا مجھ سے
میں دنیا سے انوکھا تھا کہ وہ کرتا وفا مجھ سے؟

🩸مرے پہلو میں دل رکھ کر مجھے قسمت نے لٹوایا
نہ میرے پاس دل ہوتا نہ کوئی مانگتا مجھ سے

🩸میں دیوانہ ہوں میرے پاس محشر میں کھڑے رہنا
نہ جانے میں کہوں کیا اور کیا پوچھے خدا مجھ سے

تو کیا اپنی سزائے قتل پر خود دستخط کر دوں؟
وہ لکھواتے ہیں کیوں جرمِ وفا کا فیصلہ مجھ سے

🩸غلط تھی یہ مَثَل سب دبنے والے کو دباتے ہیں
دبا میں خاک میں، تو خاک کو دبنا پڑا مجھ سے

بتا او میرے غارت گر، اب ان کو کیا بتاؤں میں؟
مسافر پوچھتے ہیں تیری منزل کا پتا مجھ سے

سنے کس کس کی وہ سیماب کس کس کو تسلی دے
پڑے رہتے ہیں لاکھوں اُس کے در پر بے نوا مجھ سے

سیماب اکبر آبادی

سب نے آ آ کے مرا ذہنی توازن چھیڑا لوگ جو جو بھی محبت سے اتارے دل میں

آلِ عمر

ایسی وسعت کہ چمکتے ہیں ستارے دل میں
اس کو رہنا ہی نہیں آیا ہمارے دل میں

سب نے آ آ کے مرا ذہنی توازن چھیڑا
لوگ جو جو بھی محبت سے اتارے دل میں

تُو نے کیا جرم کیا ہوگا جو میں رہتا رہا
اتنا عرصہ مرے چندا ترے پیارے دل میں

تیرا رونا ترے کچھ کام نہیں آئے گا دوست
سبز بتی پہ نہیں کُھلتے اشارے دل میں

کوئی دو چار نئے زخم کہ رَش پڑ جائے
صرف اک ڈر رہا کرتا ہے بیچارے دل میں

سچے دل والی مرے حجرے میں رہتی ہے حضور
میٹھے پانی کا کنواں ہے مرے کھارے دل میں

میرا اللہ مرے ساتھ ہے، وہ جانتی ہے
اس نے ڈرتے ہوئے چلوائے ہیں آرے دل میں

تجھے بھول جانے کی کوششیں۔۔۔۔۔۔۔۔۔۔۔۔ کبھی کامیاب نہ ہو سکیں تری یاد شاخ گلاب ہے ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔جو ہوا چلی تو لچک گئ

کہیں چاند راہوں میں کھو گیا ۔۔۔۔۔۔۔۔۔کہیں چاندنی بھی بھٹک گئی
میں چراغ وہ بھی بجھا ہوا۔۔۔۔۔۔۔۔۔۔۔۔۔۔۔ میری رات کیسے چمک گئی

مری داستاں کا عروج تھا۔۔۔۔۔۔۔۔۔۔۔۔۔ تری نرم پلکوں کی چھاؤں میں
مرے ساتھ تھا تجھے جاگنا۔۔۔۔۔۔۔۔۔۔۔۔۔۔۔۔ تری آنکھ کیسے جھپک گئی

بھلا ہم ملے بھی تو کیا ملے۔۔۔۔۔۔۔۔۔۔۔۔۔۔۔۔۔۔۔۔ وہی دوریاں وہی فاصلے
نہ کبھی ہمارے قدم بڑھے۔۔۔۔۔۔۔۔۔۔۔۔۔۔۔۔ نہ کبھی تمہاری جھجک گئی

ترے ہاتھ سے میرے ہونٹ تک۔۔۔۔۔۔۔۔۔۔۔۔۔۔۔۔ وہی انتظار کی پیاس ہے
مرے نام کی جو شراب تھی۔۔۔۔۔۔۔۔۔۔۔۔۔ کہیں راستے میں چھلک گئی

تجھے بھول جانے کی کوششیں۔۔۔۔۔۔۔۔۔۔۔۔ کبھی کامیاب نہ ہو سکیں
تری یاد شاخ گلاب ہے ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔جو ہوا چلی تو لچک گئ

میں تجھ سے آنکھ ملا کر غزل سناؤں گا میں خود کو ڈوبتا دیکھوں گا اور بچاؤں گا نئیں

آلِ عمر

کرونگا عشق وراثت کا کچھ بتاؤں گا نئیں
میں اک غریب کی بیٹی کو آزماؤں گا نئیں

انہیں کہو کہ بہت ڈھیر شور و شر نہ کریں
میں ڈر گیا تو کئی روز مسکراؤں گا نئیں

تسلی دونگا تو مر جائے گی، وہ لڑکی ہے
میں جانے دونگا گلے سے اسے لگاؤں گا نئیں

اسے خبر بھی نہیں ہوگی اتنا چاہوں گا
اسے پتہ بھی نہیں ہوگا، میں بتاؤں گا نئیں

یہ راستہ بڑی مشکل سے طے کیا میں نے
یہ فاصلہ ہے دلوں کا اسے مٹاؤں گا نئیں

ترا مطالبہ ہے _____ تیری یاد کے آنسو
میں اب کے رویا تو آنکھوں کو بھی بچاؤں گا نئیں

اور اب کی سالگرہ پر پلان کیا ہے ترا۔۔؟؟؟
اور اب کی بار تو میں سامنے بھی آؤں گا نئیں

میں تجھ سے آنکھ ملا کر غزل سناؤں گا
میں خود کو ڈوبتا دیکھوں گا اور بچاؤں گا نئیں

پہلی قسطوں میں تری موت نہیں ہو سکتی اپنے تھیٹر کو میں ویران نہیں کر سکتا

دوسرا عشق مری جان! نہیں کر سکتا
یہ ترا حافظِ قرآن نہیں کر سکتا

دسترس میں ہے مری کیف بھی کیفیت بھی
زخم بھر کر مجھے حیران نہیں کر سکتا

ان پہ غالب ہے کئی چہروں کے اشراک کا دین
تو ان آنکھوں کو مسلمان نہیں کر سکتا

پہلی قسطوں میں تری موت نہیں ہو سکتی
اپنے تھیٹر کو میں ویران نہیں کر سکتا

یہ مرا آخری پتھر ہے تری یاد میں دوست
اب میں پانی کو پریشان نہیں کر سکتا

نظر ٹھہرتی نہ تھی اس پہ اور خود پر بھی میں آئینے میں تھی کل ایک لالہ فام کے ساتھ

ترے خیال، ترے خواب، تیرے نام کے ساتھ
بنی ہے خاک مری کتنے اہتمام کے ساتھ

بہت سے پھول تھے اور سارے اچھے رنگوں کے
صبا نے بھیجے تھے جو کل ترے پیام کے ساتھ

نظر ٹھہرتی نہ تھی اس پہ اور خود پر بھی
میں آئینے میں تھی کل ایک لالہ فام کے ساتھ

ترے خیال سے روشن ہے سر زمین سخن
کہ جیسے زینت شب ہو مہ تمام کے ساتھ

پھر آ گئی ہے مرے در پہ کیا وہی دنیا؟
میں کر کے آئی تھی رخصت جسے سلام کے ساتھ

سنا ہے پھول جھڑے تھے جہاں ترے لب سے
وہاں بہار اترتی ہے روز شام کے ساتھ

خوشی کے واسطے کب کوئی دن مقرر تھا
مگر یہ دل میں رکی ہے ترے خرام کے ساتھ

نرجس افروز زیدی

اس نے چوما تھا ہتھیلی پہ سو مُٹھی میں مری تتلیاں قید ہیں _____ آزاد نہیں کرتا میں

شام کے بعد تجھے یاد نہیں کرتا میں
یوں چراغوں کی بھی امداد نہیں کرتا میں

ہاتھ میں کاسہ کوئی دیکھ کے پہچان نہ لے
دھند چَھٹ جائے تو فریاد نہیں کرتا میں

اس نے چوما تھا ہتھیلی پہ سو مُٹھی میں مری
تتلیاں قید ہیں _____ آزاد نہیں کرتا میں

میری آنکھیں بھلے چہروں کی گزرگاہیں ہیں
رو کے ان گلیوں کو برباد نہیں کرتا میں 

اس قدر لذتِ یکتائی ہے یارو سرِ ہجر
وصل کے ذائقے بھی یاد نہیں کرتا میں