جب سے دیکھا ہے ترے چہرے کو اس شہر کے لوگ! پھول باغیچہ و گلدان کہاں دیکھتے ہیں

جیت اور ہار کا امکان کہاں دیکھتے ہیں

گاؤں کے لوگ ہیں نقصان کہاں دیکھتے ہیں

جب سے دیکھا ہے ترے چہرے کو اس شہر کے لوگ!

پھول باغیچہ و گلدان کہاں دیکھتے ہیں

قیمتی شے تھی ترا ہجر اٹھائے رکھا

ورنہ سیلاب میں سامان کہاں دیکھتے ہیں

مجھ کو افلاک سے ہجرت کی صدا آتی ہے،

آدمی عشق میں زندان کہاں دیکھتے ہیں

عامرؔ اس تخت میں تابوت نظر آتا ہے

دیکھتے ہم ہیں یہ دربان کہاں دیکھتے ہیں

مرا یہ خون مرے دشمنوں کے سر ہوگا میں دوستوں کی حراست ميں مارا جاؤں گا

کہاں کسی کی حمایت میں مارا جاؤں گا
میں کم شناس مروت ميں مارا جاؤں گا

میں مارا جاؤں گا پہلے کسی فسانے میں
پھر اس کے بعد حقیقت میں مارا جاؤں گا

مجھے بتایا ہوا ہے مری چھٹی حس نے
میں اپنے عہدِ خلافت میں مارا جاؤں گا

مرا یہ خون مرے دشمنوں کے سر ہوگا
میں دوستوں کی حراست ميں مارا جاؤں گا

یہاں کمان اٹھانا مری ضرورت ہے
وگرنہ میں بھی شرافت میں مارا جاؤں گا

میں چپ رہا تو مجھے مار دے گا میرا ضمیر
گواہی دی تو عدالت میں مارا جاؤں گا

فراغ میرے لیے موت کی علامت ہے
میں اپنی پہلی فراغت میں مارا جاؤں گا

نہیں مروں گا کسی جنگ میں یہ سوچ لیا
میں اب کی بار محبت میں مارا جاؤں گا

قُرباں ترے کہ اک نگہ التفات نے دل کی جھِجک کو جراءت رندانہ کر دیا ۔

ارض و سما کو ساغر و پیمانہ کر دیا
رندوں نے کائنات کو میخانہ کر دیا
۔
اے حُسن! داد دے کہ تمنائے عشق نے
تیری حیا کو عشوہء تُرکانہ کر دیا
۔
قُرباں ترے کہ اک نگہ التفات نے
دل کی جھِجک کو جراءت رندانہ کر دیا
۔
صد شکر درسِ حکمتِ ناحق شناس کو
ھم نے رہینِ نعرہء مستانہ کر دیا
۔
کچھ روز تک تو نازشِ فرزانگی رہی
آخر ہجومِ عقل نے دیوانہ کر دیا
۔
دُنیا نے ہر فسانہ حقیقت بنا دیا
ہم نے حقیقتوں کو بھی افسانہ کر دیا
۔
آواز دو کہ جنسِ دو عالم کو جوش نے
قربانِ یک تبسّمِ جانانہ کر دیا​

کب کسی قرب کی جنت کا تمنائی ہے یہ ترے ہجر کے دوزخ سے گزارا ہوا شخص

بخت کے تخت سے یکلخت اتارا ہوا شخص
تُو نے دیکھا ہے کبھی جیت کے ہارا ہوا شخص

ہم تو مقتل میں بھی آتے ہیں بصد شوق و نیاز
جیسے آتا ہے محبت سے پکارا ہوا شخص

کب کسی قرب کی جنت کا تمنائی ہے
یہ ترے ہجر کے دوزخ سے گزارا ہوا شخص

بعد مدت کے وہی خواب ہے پھر آنکھوں میں
لوٹ آیا ہے کہیں جا کے سِدھارا ہوا شخص

اب اندھیرے ہیں کہ لیتے ہیں بلائیں اُس کی
روشنی بانٹ گیا دیپ پہ وارا ہوا شخص

موت کے جبر میں ڈھونڈی ہیں پناہیں اس نے
زندگی یہ ہے ترے لطف کا مارا ہوا شخص

میں چل پڑا ہوں اندھیرے کی انگلیاں تھامے اترتی شام کے رخ کا جمال ایسا تھا

ہر ایک رنگ دھنک کی مثال ایسا تھا
شب وصال تمھارا جمال ایسا تھا

ہوا کے ہاتھ پہ چھالے ہیں آج تک موجود
مرے چراغ کی لو میں کمال ایسا تھا

میں چل پڑا ہوں اندھیرے کی انگلیاں تھامے
اترتی شام کے رخ کا جمال ایسا تھا

ذرا سی دیر بھی ٹھہرا نہیں ہوں موجوں میں
سمے کے بحر میں اب کے اچھال ایسا تھا

وہ سر اٹھائے یہاں سے پلٹ گیا آبشار
میں سر جھکائے کھڑا ہوں سوال ایسا تھا

شہرت کے مول خوب لگے شہر میں مگر ہم محترم کہاں تھے جو کردار بیچتے

سر کو بچاتے یا درودیوار بیچتے
سر کی حفاظتوں میں کیا دستار بیچتے

شہرت کے مول خوب لگے شہر میں مگر
ہم محترم کہاں تھے جو کردار بیچتے

اس کانپتی زمیں نے سب خاک کر دیا
ورنہ ہم آرزؤں کے مینار بیچتے

ہوتا جو اختیار مرے ہاتھ میں تو پھر
بستے خرید لاتے یہ ہتھیار بیچتے

قانون کو جو سیماؔ سمجھ لیتے آج ہم
تو بھوک اور جہل کے آزار بیچتے

اس کو پردے کا تردد نہیں کرنا پڑتا ایسا چہرہ ہے کہ دیکھیں تو حیا آتی ہے

اِس خرابے میں کچھ آگے وہ جگہ آتی ہے
کہ جہاں خواب بھی ٹوٹے تو صدا آتی ہے

میں نے زندان میں سیکھا تھا، اسیروں سے، اک اِسم
جس کو دیوار پہ پھونکیں تو ہوا آتی ہے

خوب رونق تھی اِن آنکھوں میں، پھر اک خواب آیا
ایسے، جیسے کسی بستی میں وبا آتی ہے

لڑنے جاتے ہیں کہ کچھ مالِ غنیمت لے آئیں
اور پھر گھر کی طرف سرخ زرہ آتی ہے

اس کو پردے کا تردد نہیں کرنا پڑتا
ایسا چہرہ ہے کہ دیکھیں تو حیا آتی ہے

ٹھیک ہے، ساتھ رہو میرے، مگر ایک سوال
تم کو وحشت سے حفاظت کی دعا آتی ہے؟ :)

صحن میں پھرتی ہے برسوں کی سدھائی ہوئی یاد
جب بھی پُچکار کے کہتا ہوں کہ "آ"، آتی ہے!

مٹا کر رکھ دیے ہیں یوں ہزاروں بے زباں تو نے نہ رکھا اپنے عہدِ ظلم کا کوئی نشاں تو نے

خدا معلوم کیا سے کیا کیا ہو گا بیاں تو نے
لفافے میں نہ رکھ لی نامہ بر میری زباں تو نے

مٹا کر رکھ دیے ہیں یوں ہزاروں بے زباں تو نے
نہ رکھا اپنے عہدِ ظلم کا کوئی نشاں تو نے

تجھ فوراَ ہی میرا قصہ روک دینا تھا
ترا دکھتا تھا دل تو کیوں سنی تھی داستاں تو نے

ہرے پھر کر دیے زخمِ جگر صیاد بلبل کے
قفس کے سامنے کہہ کر گلوں کی داستاں تو نے

اسی وعدے پہ کھائی تھی قسم روئے کتابی کی
اسی صورت میں قرآں کو رکھا تھا درمیاں تو نے

عدو کہتے ہیں اب سہرا فصاحت کا ترے سر ہے
قمر بالکل بنا دی ہے تو نے دلھن اردو زباں تو نے

میں سب کے پاس ہوں پر کوئی میرے پاس نہیں کسی تماشے یا سرکس کا اشتہار ہوں میں

کبھی ہنسی، کبھی آنسو کبھی غُبار ہوں میں
مجھے کھنگالو کہ جذبوں کا ریگ زار ہوں میں

بدن ہے کانچ کا لیکن محققو ٹھہرو
سنبھل کے ہاتھ لگانا کہ سنگسار ہوں میں

ہر التجا مجھے ٹھکرا کے لوٹ جاتی ہے
خلا میں کوئی معلق سا کوہسار ہوں میں

میں سب کے پاس ہوں پر کوئی میرے پاس نہیں
کسی تماشے یا سرکس کا اشتہار ہوں میں

سمٹ گیا ہوں تو اچھا ہے ٹھوس کی صورت
مجھے نہ چھیڑو کہ تخریب کا غبار ہوں میں

میں بدن کو درد کے ملبوس پہناتا رہا روح تک پھیلی ہوئی ملتی ہے عریانی مجھے

عکس کی صورت دکھا کر آپ کا ثانی مجھے
ساتھ اپنے لے گیا بہتا ہوا پانی مجھے

میں بدن کو درد کے ملبوس پہناتا رہا
روح تک پھیلی ہوئی ملتی ہے عریانی مجھے

اس طرح قحط ہوا کی زد میں ہے میرا وجود
آندھیاں پہچان لیتی ہیں بہ آسانی مجھے

بڑھ گیا اس رت میں شاید نکہتوں کا اعتبار
دن کے آنگن میں لبھائے رات کی رانی مجھے

منجمد سجدوں کی یخ بستہ مناجاتوں کی خیر
آگ کے نزدیک لے آئی ہے پیشانی مجھے

زنجیر کوئی لا مری وحشت کے برابر اس حلقۂ مژگاں میں ٹھہرنے کا نہیں میں

سمجھوتہ کوئی وقت سے کرنے کا نہیں میں
اب ترکِ مراسم سے بھی ڈرنے کا نہیں میں

زنجیر کوئی لا مری وحشت کے برابر
اس حلقۂ مژگاں میں ٹھہرنے کا نہیں میں

کل رات عجب دشتِ بلا پار کیا ہے
سو بادِ سحر سے تو سنورنے کا نہیں میں

کیوں مملکتِ عشق سے بے دخل کیا تھا
اب مسندِ غم سے تو اترنے کا نہیں میں

دم بھر کے لیے کوئی سماعت ہو میسّر
بے صوت و صدا جاں سے گزرنے کا نہیں میں

اب چشمِ تماشا کو جھپکنے نہیں دینا
اس بار جو ڈوبا تو ابھرنے کا نہیں میں

ہر شکل ہے مجھ میں مری صورت کے علاوہ
اب اس سے زیادہ تو نکھرنے کا نہیں میں

دیکھ کر ضبط میرا، دشت نے پاؤں پکڑے پھر میری پیاس پہ کہتے ہیں سمندر ناچا

اس نے یکبار جو محفل میں اُٹھائیں پلکیں
دستِ ساقی کبھی بوتل، کبھی ساغر ناچا

دھڑکنیں وجد کناں ہو کے ہوئیں چُپ ایسے
جب میرے دل پہ میرے یار کا خنجر ناچا

کیا کہیں کتنی دراڑوں نے زباں کھولی ہے
دل کے شیشے پہ جو اک ہجر کا کنکر ناچا

وقتِ رخصت میری پلکوں سے لہو بھی نچڑا
پھر میرا ضبط میری آنکھ میں آ کر ناچا

دیکھ کر ضبط میرا، دشت نے پاؤں پکڑے
پھر میری پیاس پہ کہتے ہیں سمندر ناچا

یار نے دیکھ لیا جب ثاقب دلِ خستہ کو
پھر یہ پاگل، سرِ محفل، سرِ محشر ناچا

یوں لگتا ہے صدیاں ہوئی اُس شخص کو دیکھے حالانکہ جسے میں نے فقط کل نہیں دیکھا

اک پل بھی اُسے آنکھ سے اُوجھل نہیں دیکھا
میں پھر بھی یہ کہتا ہوں مکمل نہیں دیکھا

میں نے تو گزرتے ہوئے دیکھا تھا اسے لیکن
وہ دل کا بہت سخت تھا اک پل نہیں  دیکھا

کچھ دن سے ہوا حبس زدہ شہر کا موسم
کچھ دن سے فلک پر کوئی بادل نہیں دیکھا

یوں لگتا ہے صدیاں ہوئی اُس شخص کو دیکھے
حالانکہ جسے میں نے فقط کل نہیں دیکھا

جو تجھ سے گریزاں ہے اُسی شخص کی باتیں
جرارؔ کہیں تجھ سا کوئی پاگل نہیں دیکھا

کتنے ہیرے میری آنکھون سے چُرائے تو نے چَند پتھر میری جھولی میں گِرانے والے

موج خوشــــبو کی طرح،، بات اُڑانے والے
تُجھ میں پہلے تو نہ تھے رنگ زمانے والے

کتنے ہیرے میری آنکھون سے چُرائے تو نے
چَند پتھر میری جھولی میں گِرانے والے

خوں بہا اگلی بہاروں کا تیرے سر تو نہیں
خُشک ٹہنی پہ نیا پُھول کِھلانے والے

آ تجھے نظر کروں اَپنی ہی شہہ رگ کا لہو
میرے دُشــــمں میری توقیر بڑھانے والے

آستینوں میں چھپائے ہوئے خنجر آئے
مجھ سے یاروں کی طرح ہاتھ مِلانے والے

ظلمتِ شب سے شکایت اُنہیں کیسی محسنؔ
وہ تو سُورج کو تھے آئینہ دکھانے والے

"میں قامتِ نیزہ پہ بھی اٹّھا ہوا سر ہوں” سلطان! تری جیت مری ہار سے کم ہے

بیعت کی صدی لمحۂ انکار سے کم ہے
سردار! تری عمر سرِ دار سے کم ہے

اس بات پہ شاہد ہے یہ مشکیزہ ء خالی!
اک گھونٹ کی وقعت مرے پندار سے کم ہے

حق یہ ہے کہ اک نکتۂ پاراں کے سوا بھی
دربار میں جو کچھ ہے درِ یار سے کم ہے

میں خاک نشینوں کے نشاں دیکھنے والا
کرسی کی بلندی مرے معیار سے کم ہے

"میں قامتِ نیزہ پہ بھی اٹّھا ہوا سر ہوں”
سلطان! تری جیت مری ہار سے کم ہے

یہ وار مرے دل کے بہت پاس سے ہوگا
خطرہ ہے مگر غیر کی تلوار سے کم ہے

لگتا ہے زمانے کا چلن یوں ہی رہے گا
اس بار بھی قیمت مری ہر بار سے کم ہے

شکوہ ہے مگر کس سے ، یہ کچھ نہیں کھلتا
سچ یہ ہے کہ اس عشق کے آزار سے کم ہے

میں ادا کروں کہ قضا کروں ، اسی کشمکش میں بسر ہوئی یونہی سجدہ گاہِ حیات سے میں گناہگار چلا گیا

وہ کلاہِ کج ، وہ قبائے زر ،سبھی کچھ اُتار چلا گیا
ترے در سے آئی صدا مجھے ، میں دِوانہ وار چلا گیا

کسے ہوش تھا کہ رفو کرے یہ دریدہ دامنِ آرزو
میں پہن کے جامۂ بیخودی سرِ کوئے یار چلا گیا

مری تیزگامئ شوق نے وہ اُڑائی گرد کہ راستہ
جو کھلا تھا میری نگاہ پر وہ پسِ غبار چلا گیا

نہ غرورِ عالمِ آگہی ، نہ جنون و جذبۂ بیخودی
مئے عشقِ خانہ خراب کا ہر اک اعتبار چلا گیا

تری کائناتِ جمال میں جو عطائے دستِ مجال تھا
مرے شوقِ افسوں طراز کا وہی اختیار چلا گیا

میں ادا کروں کہ قضا کروں ، اسی کشمکش میں بسر ہوئی
یونہی سجدہ گاہِ حیات سے میں گناہگار چلا گیا

ترے آستاں سے گلہ نہیں ، دلِ سوختہ ہی عجیب ہے
کبھی بے سکون ٹھہر گیا ، کبھی بے قرار چلا گیا

تری جلوہ گاہِ نیاز میں، ہے کوئی تماشۂ آرزو !
کبھی تابِ دید نہ آسکی ،کبھی انتطار چلا گیا

مجھے کاروبارِ وفا ملا ، وہ متاعِ صبر و غنا ملی
مرے دن ظہیرؔ بدل گئے ، غمِ روزگار چلا گیا

غرور اس کا بھی کچھ تھا جدائیوں کا سبب کچھ اپنے سر میں بھی شاید ہوا زیادہ تھی

نہ جانے ظرف تھا کم یا انا زیادہ تھی
کلاہ سر سے تو قد سے قبا زیادہ تھی

رمیدگی تھی تو پھر ختم تھا گریز اس پر
سپردگی تھی تو بے انتہا زیادہ تھی

غرور اس کا بھی کچھ تھا جدائیوں کا سبب
کچھ اپنے سر میں بھی شاید ہوا زیادہ تھی

وفا کی بات الگ پر جسے جسے چاہا
کسی میں حسن، کسی میں ادا زیادہ تھی

فراز اس سے وفا مانگتا ہے جاں کے عوض
جو سچ کہیں تو یہ قیمت ذرا زیادہ تھی

تو بچھڑ رھا ھے تو سوچ لے تیرے ھاتھ ھے میری زندگی تجھے روکنا میری موت ھے ، میری بے بسی کا خیال کر

نہ بجھا چراغ دیار دل نہ بچھڑنے کا تو ملال کر
تجھے دے گی جینے کا حوصلہ میری یاد رکھ لے سنبھال کر

یہ بھی کیا کہ ایک ھی شخص کو کبھی سوچنا کبھی بھولنا
جو نہ بجھ سکے وہ دیا جلا جو نہ ھو سکے وہ کمال کر

غم آرزو مری جستجو میں سمٹ کے آ گیا روبرو
یہ سکوت مرگ ھے کس لئے ، میں جواب دوں تو سوال کر

تو بچھڑ رھا ھے تو سوچ لے تیرے ھاتھ ھے میری زندگی
تجھے روکنا میری موت ھے ، میری بے بسی کا خیال کر

یہ جو ایک ساعت وصل ھے ، سر سطح ذہن جمی ھوئی
اسی ایک ساعت وصل کو کبھی ماہ کر کبھی سال کر

میرے درد کا ، میرے ضبط کا ، میری بے بسی ، میرے صبر کا
جو یقیں نہ آئے تو دیکھ لے تو ھوا میں پھول اچھال کر

تیری سرحدوں پہ میں کیوں رکوں ، مجھے روک مت ، مجھے جانے دے
میری ساری عمر سفر کی ھے مجھے اس قدر نہ نڈھال کر

جو خوشی ملی وہ قبول کر، مجھے چھوڑ دے ، مجھے بھول جا
میں ھوں جاذب ستم آشنا ، تو بس اپنے گھر کا خیال کر

جتنی پیڑوں میں نظر آتی ہے تقلیب کے بعد یہ زمیں اتنی پر اسرار نہیں ہو سکتی

چاند چھونے کی طلب گار نہیں ہو سکتی
کیا مری خاک چمک دار نہیں ہو سکتی

ہو نہ ہو اپنی بصارت نے مجھے روکا ہے
غیب جاتے ہوئے دیوار نہیں ہو سکتی

جتنی پیڑوں میں نظر آتی ہے تقلیب کے بعد
یہ زمیں اتنی پر اسرار نہیں ہو سکتی

میں نے ڈھونڈا ہے چراغوں کی لوؤں میں تجھ کو
تو ستارے میں نمودار نہیں ہو سکتی

یہ زمینوں پہ لہکتی ہوئی گندم کی مہک
آسمانوں کی طرف دار نہیں ہو سکتی

میں کسے خواب سنانے کے لیے آیا ہوں
شب اگر نیند سے بیدار نہیں ہو سکتی

جس نے آنسو پہ قناعت کا چلن سیکھا ہو
وہ نظر خوگر دینار نہیں ہو سکتی

ہم فقیروں کے لیے شاہ و گدا ایک سے ہیں بات کرنا بھی تو لہجہ ذرا دھیما کر کے

اپنے ہی گھر کے دروبام سے جھگڑا کر کے
میں نکل آیا ہوں کمرے کو اکیلا کر کے

جاؤ تم خواب کنارے پہ لگاؤ خیمے
میں بھی آتا ہوں ذرا شام کو چلتا کر کے

پہلے پہلے یہاں جنگل تھا گھنیرا جنگل
کاٹنے والوں نے چھوڑا اسے رستہ کر کے

وہ شب و روز، مہ و سال، وہ بکھرے لمحے
آپ کہیے تو اٹھا لاتا ہوں یکجا کر کے

ہم فقیروں کے لیے شاہ و گدا ایک سے ہیں
بات کرنا بھی تو لہجہ ذرا دھیما کر کے

عشق منصوبہ بنا کر نہیں ہوتا ہر گز
شعر لکھا نہیں جاتا ہے ارادہ کر کے

کوچۂ یار سے محشر میں بلاتا ہے خدا کہہ دو مضطرؔ کہ نہ آئیں گے یہیں اچھے ہیں

انہیں لوگوں کی بدولت یہ حسیں اچھے ہیں
چاہنے والے ان اچھوں سے کہیں اچھے ہیں

کوچۂ یار سے یا رب نہ اٹھانا ہم کو
اس برے حال میں بھی ہم تو یہیں اچھے ہیں

نہ کوئی داغ نہ دھبا نہ حرارت نہ تپش
چاند سورج سے بھی یہ ماہ جبیں اچھے ہیں

کوئی اچھا نظر آ جائے تو اک بات بھی ہے
یوں تو پردے میں سبھی پردہ نشیں اچھے ہیں

تیرے گھر آئیں تو ایمان کو کس پر چھوڑیں
ہم تو کعبے ہی میں اے دشمن دیں اچھے ہیں

ہیں مزے حسن و محبت کے انہیں کو حاصل
آسماں والوں سے یہ اہل زمیں اچھے ہیں

ایک ہم ہیں کہ جہاں جائیں برے کہلائیں
ایک وہ وہ ہیں کہ جہاں جائیں وہیں اچھے ہیں

کوچۂ یار سے محشر میں بلاتا ہے خدا
کہہ دو مضطرؔ کہ نہ آئیں گے یہیں اچھے ہیں

سلیقہ ہی نہیں شاید اسے محسوس کرنے کا جو کہتا ہے خدا ہے تو نظر آنا ضروری ہے

محبت نا سمجھ ہوتی ہے سمجھانا ضروری ہے
جو دل میں ہے اسے آنکھوں سے کہلانا ضروری ہے

اصولوں پر جہاں آنچ آئے ٹکرانا ضروری ہے
جو زندہ ہو تو پھر زندہ نظر آنا ضروری ہے

نئی عمروں کی خود مختاریوں کو کون سمجھائے
کہاں سے بچ کے چلنا ہے کہاں جانا ضروری ہے

تھکے ہارے پرندے جب بسیرے کے لیے لوٹیں
سلیقہ مند شاخوں کا لچک جانا ضروری ہے

بہت بے باک آنکھوں میں تعلق ٹک نہیں پاتا
محبت میں کشش رکھنے کو شرمانا ضروری ہے

سلیقہ ہی نہیں شاید اسے محسوس کرنے کا
جو کہتا ہے خدا ہے تو نظر آنا ضروری ہے

مرے ہونٹوں پہ اپنی پیاس رکھ دو اور پھر سوچو
کہ اس کے بعد بھی دنیا میں کچھ پانا ضروری ہے؟؟؟؟

یوں جسم مہکتا ہے ہوائے گل تر سے! جیسے کوئی پہلو سے ابھی اٹھ کے گیا ہو

کلیوں کا تبسم ہو، کہ تم ہو کہ صبا ہو
اس رات کے سناٹے میں، کوئی تو صدا ہو
یوں جسم مہکتا ہے ہوائے گل تر سے!
جیسے کوئی پہلو سے ابھی اٹھ کے گیا ہو
دنیا ہمہ تن گوش ہے، آہستہ سے بولو
کچھ اور قریب آؤ، کوئی سن نہ رہا ہو
یہ رنگ، یہ انداز نوازش تو وہی ہے
شاید کہ کہیں پہلے بھی تو مجھ سے ملا ہو
یوں رات کو ہوتا ہے گماں دل کی صدا پر
جیسے کوئی دیوار سے سر پھوڑ رہا ہو
دنیا کو خبر کیا ہے مرے ذوق نظر کی
تم میرے لیے رنگ ہو، خوشبو ہو، ضیا ہو
یوں تیری نگاہوں میں اثر ڈھونڈ رہا ہوں
جیسے کہ تجھے دل کے دھڑکنے کا پتا ہو
اس درجہ محبت میں تغافل نہیں اچھا
ہم بھی جو کبھی تم سے گریزاں ہوں تو کیا ہو
ہم خاک کے ذروں میں ہیں اخترؔ بھی، گہر بھی
تم بام فلک سے، کبھی اترو تو پتا ہو

اب تو ہم گھر سے نکلتے ہیں تو رکھ دیتے ہیں طاق پر عزتِ سادات بھی دستار کے ساتھ

وحشتیں بڑھتی گئیں ہجر کے آزار کے ساتھ
اب تو ہم بات بھی کرتے ہیں غم خوار کے ساتھ

ہم نے اک عمر بسر کی ہے غم یار کے ساتھ
میر دو دن نہ جئے ہجر کے آزار کے ساتھ

اب تو ہم گھر سے نکلتے ہیں تو رکھ دیتے ہیں
طاق پر عزتِ سادات بھی دستار کے ساتھ

اس قدر خوف ہے اب شہر کی گلیوں میں کہ لوگ
چاپ سُنتے ہیں تو لگ جاتے ہیں دیوار کے ساتھ

ایک تو خواب لیے پھرتے ہو گلیوں گلیوں
اس پہ تکرار بھی کرتے ہو خریدار کے ساتھ

شہر کا شہر ہی ناصح ہو تو کیا کیجیے گا
ورنہ ہم رند تو بھڑ جاتے ہیں دو چار کے ساتھ

ہم کو اس شہر میں تعمیر کا سودا ہے جہاں
لوگ معمار کو چن دیتے ہیں دیوار کے ساتھ

جو شرف ہم کو ملا کوچۂ جاناں سے فراز
سوئے مقتل بھی گئے ہیں اسی پندار کے ساتھ

کتابوں کی نہیں یہ تجربے کی بات ہے صاحب پیئے ہیں اشک ہم نے اسلئے نمکین کہتے ہیں

اُنھیں اُنکا ہمیں اپنا اِسے ہم دِین کہتے ہیں
مگر پھر ہر کسی کو مجرمِ توہین کہتے ہیں

کڑے ایمان کی بستی پہ رشوت راج کرتی ہے
ضمیروں کی اِسی کو مشترک تدفین کہتے ہیں

تجھے تیری زباں میٹھی لگے لگتی رہے واعظ
مگر میری لغت میں تو اِسے سکّین کہتے ہیں

عجب یہ ہے مخالف بھی  ہمیں تب داد دیتے ہیں
کہ جب ہم صورتِ حالات کو سنگین کہتے ہیں

ہم اپنی گفتگو کو شاعری خود بھی نہیں کہتے
اِسے ہم بھینس کے آگے سریلی بِین کہتے ہیں

'مسلسل بھوک میں ہم سے عبادت ہو نہیں پاتی'
ذرا سنیے تو کیا اِس شہر کے مسکین کہتے ہیں

کتابوں کی نہیں یہ تجربے کی بات ہے صاحب
پیئے ہیں اشک ہم نے اسلئے نمکین کہتے ہیں

ہمیں اِس شہپری کی شہہ کوئی دے کر گیا ہوگا
اِسی کارن ہم اپنے آپ کو شاہین کہتے ہیں

ہمارا نام سائیں ہے مگر احباب اکثر ہی
ہمیں جب ذکر میں لاتے ہیں تو غمگین کہتے ہیں

میں نے خود خون دیا تیغ عدو کو ورنہ بھری دنیا میں بڑے خوار مرے قاتل تھے

مرے لشکر کے کماندار مرے قاتل تھے
مرے دشمن تو نہیں یار مرے قاتل تھے

میں نے خود خون دیا تیغ عدو کو ورنہ
بھری دنیا میں بڑے خوار مرے قاتل تھے

کتنا آساں تھا مرے قتل کا لمحہ ان پر
کیسی مشکل سے یہ دو چار مرے قاتل تھے

وہ مر ے نام کی دستار پہننے والے
وہ مرے حاشیہ بردار مرے قاتل تھے

کتنے مینار مرے قد کے مقابل لائے
مری عظمت سے خبردار مرے قاتل تھے

تجھے تلوار سے رغبت مجھے ہے ڈھال کا سودا تِری تائید سے واعظ مِرا انکار تگڑا ہے

جہاں لاغر مکیں ہیں اور چوکیدار تگڑا ہے
سمجھ لیجے ضرورت سے وہاں پندار تگڑا ہے

رعایا کے لئے یکساں مگر باہم تقابل میں
امیرِ شہر سے اِس شہر کا سالار تگڑا ہے

تجھے تلوار سے رغبت مجھے ہے ڈھال کا سودا
تِری تائید سے واعظ مِرا انکار تگڑا ہے

گلوں کی شوخیاں دیدہ وروں کو کھینچ لیتی ہیں
اگرچہ پھول کی نسبت بظاہر خار تگڑا ہے

مِرے چارہ گرو تمکو اجازت ہے سعی کر لو
مگر یہ آگہی دے دُوں مِرا آزار تگڑا ہے

مِرے حصے میں کوئی سِین ہی آیا نہیں سائیں
اِسی اِک بات پر خوش ہُوں مِرا کردار تگڑا ہے

دشتِ ہجراں سے گزر آیا ہوں جیسے تیسے اب کوئی غم مجھے پاگل نہیں کرنے والا

ایسی غلطی سرِ مقتل نہیں کرنے والا
مَیں کوئی بات مدلل نہیں کرنے والا

ہر کوئی تاک میں ہے دوسرا مصرعہ کیا ہے
اور مَیں شعر مکمل نہیں کرنے والا

یہ جو درپیش ہے احساس کا سوکھا موسم
اِسکا درماں کوئی بادل نہیں کرنے والا

دشتِ ہجراں سے گزر آیا ہوں جیسے تیسے
اب کوئی غم مجھے پاگل نہیں کرنے والا

یہ مِرے اشک بخارات میں ڈھل جائیں گے
میں کسی راہ میں جل تھل نہیں کرنے والا

جِس پہ افشاں ہی نہیں شہر کی مشکل سائیں
کچھ بھی کر لے وہ مگر حل نہیں کرنے والا

جب آئے گی تو مَیں ہی کیا یہ سارا شہر دیکھے گا جسے چند ایک ہی دیکھیں وہ فصلِ گُل نہیں ہوتی

اگر انسان میں اپنی بقا کی چُل نہیں ہوتی
تو نسلِ آدمی یوں محوِ شور و غُل نہیں ہوتی

مِرے واعظ تجھے اِک بات کہنا تھی سو کہہ ڈالوں
کہ جو بس ایک انساں میں ہو عقلِ کُل نہیں ہوتی

جب آئے گی تو مَیں ہی کیا یہ سارا شہر دیکھے گا
جسے چند ایک ہی دیکھیں وہ فصلِ گُل نہیں ہوتی

چمن برباد ہو جانے کا منظر یوں بھی ہوتا ہے
کہ ہرسُو زاغ ہوتے ہیں کوئی بلبل نہیں ہوتی

پرندہ جانتا تھا کچھ نہ کچھ پانی ضروری ہے
فقط کنکر گرا دینے سے مٹکی فُل نہیں ہوتی

مِری برگشتہ حالی میں نہاں اِک راز یہ بھی ہے
کہ منصوبے تو بنتے ہیں مگر ہِل جُل نہیں ہوتی

میں وجہِ ترکِ تعلق بتا تو دُوں ، لیکن اِس انکشاف سے اک خاندان ٹوٹتا ہے

زمیں سرکتی ہے ، پھر سائبان ٹوٹتا ہے
اور اُس کے بعد سدا آسمان ٹوٹتا ہے

میں اپنے آپ میں تقسیم ہونے لگتا ہُوں
جو ایک پَل کو کبھی تیرا دھیان ٹوٹتا ہے

کوئی پرند سا پَر کھولتا ہے اُڑنے کو
پھر اک چھناکے سے یہ خاکدان ٹوٹتا ہے

جسے بھی اپنی صفائی میں پیش کرتا ہُوں
وہی گواہ ، وہی مہربان ٹوٹتا ہے

نہ ہم میں حوصلہ خود کُشی ، کہ مر جائیں
نہ ہم سے قفلِ درِ پاسبان ٹوٹتا ہے

میں وجہِ ترکِ تعلق بتا تو دُوں ، لیکن
اِس انکشاف سے اک خاندان ٹوٹتا ہے

زکوٰۃِ عشق اگر بانٹنے پہ آ جاؤں
تو اک ہجومِ طلب مُجھ پہ آن ٹوٹتا ہے

کسی نے داغِ جدائی نہیں دیا ، لیکن
میں اتنا جانتا ہوں ، کیسے مان ٹوٹتا ہے

جو آندھیاں سرِ صحرائے ہجر اُٹھتی ہیں
اُنہی میں شیشہ دل ، میری جان ٹوٹتا ہے

سمجھو گے دل کی رمز مُجھی سے مگر ابھی تُم شوق پُورا کرلو، ذہینوں سے پُوچھ لو....

لعل و گُہَر کہاں ھیں، دفینوں سے پُوچھ لو
سینوں میں کافی راز ھیں، سینوں سے پُوچھ لو...

جَھیلا ھے مَیں نے تین سو پینسٹھ دُکھوں کا سال
چاھو تو پچھلے بارہ مہینوں سے پُوچھ لو...

قبروں کے دُکھ سے کم نہیں کچّے گھروں کے دُکھ
تم زندہ لاشوں یعنی مکینوں سے پُوچھ لو...

چوتھا گواہ اندھا ھے، حد کس طرح لگے ؟؟؟
عینی گواہ تین ھیں، تینوں سے پُوچھ لو...

مَیں جُونہی بوئے بیج، شجر پُھوٹنے لگے
مُجھ پر یقیں نہیں تو زمینوں سے پُوچھ لو...

سمجھو گے دل کی رمز مُجھی سے مگر ابھی
تُم شوق پُورا کرلو، ذہینوں سے پُوچھ لو....

چِھن جائے گھر تو کیسے رُلاتی ھے بےگھری
ٹُوٹی انگوٹھیوں کے نگینوں سے پُوچھ لو..

سچ سچ بتائیں گے وہ تمہیں ڈُوبنے کا لُطف
دریا کی تہہ میں غرق سفینوں سے پُوچھ لو..

ﺗُﺠﮫ ﮐﻮ ﺩﯾﮑﮭﺎ ﺟﯽ ﺑﮭﺮ ﮐﮯ ﺍﻭﺭ ﺁﻧﮑﮭﯿﮟ ﭨﮭﻨﮉﯼ ﮐﺮ ﻟﯿﮟ ﮔُﻞ ﻭُﻝ ﮐﯿﺎ، ﮔُﻠﺸﻦ ﮐﯿﺎ،____ ﺍﻭﺭ ﻣَﻨﻈﺮ ﻭَ ﻧﻈﺮ ﮐﯿﺎ

ﻣﺎﻻ ﻭﺍﻻ، ﺑِﻨﺪﯼ ﻭِﻧﺪﯼ، ﺟُﮭﻮﻣﺮ ﻭُﻭﻣﺮ ﮐﯿﺎ
ﺯﯾﻮﺭ ﺗﯿﺮﺍ ﭼﮩﺮﮦ ﺗﺠﮫ ﮐﻮ ﺯﯾﻮﺭ ﻭﯾﻮﺭ ﮐﯿﺎ

ﮐﺎﻡ ﺯُﺑﺎﮞ ﺳﮯ ﮨﯽ ﻟﯿﺘﮯ ﮨﯿﮟ ﺳﺎﺭﮮ ﻣﮩﺬﺏ ﻟﻮﮒ
ﻃَﻨﺰ ﮐﺎ ﺍﮎ ﻧﺸﺘﺮ ﮐﺎﻓﯽ ﮨﮯ____ ﭘﺘﮭﺮ ﻭﺗﮭﺮ ﮐﯿﺎ

ﺍﻭﻝ ﺗﻮ ﮨﻢ ﭘﯿﺘﮯ ﻧﺌﯿﮟ ﮨﯿﮟ___ ﮔﺮ ﭘﯿﻨﺎ ﭨﮭﮩﺮﮮ
ﺗﯿﺮﯼ ﺁﻧﮑﮭﻮﮞ ﺳﮯ ﭘﯽ ﻟﯿﻨﮕﮯ ﺳﺎﻏﺮ ﻭﺍﻏﺮ ﮐﯿﺎ

ﺟﯿﻮﻥ ﺍﮎ ﭼﮍﮬﺘﺎ ﺩﺭﯾﺎ ﮨﮯ ﮈﻭﺏ ﮐﮯ ﮐﺮ ﻟﮯ ﭘﺎﺭ
ﺍﺱ ﺩﺭﯾﺎ ﻣﯿﮟ ﮐﺸﺘﯽ ﻭ ﺷﺘﯽ ﻟﻨﮕﺮ ﻭَﻧﮕﺮ ﮐﯿﺎ

ﻣﺎﻝ ﻭﺍﻝ ﮐﺲ ﺷﻤﺎﺭ ﻣﯿﮟ ﮨﮯ ﺟﺎﻥ ﻭﺍﻥ ﮐﯿﺎ ﺷﮱ
ﺳﺮ ﻣﯿﮟ ﺳﻮﺩﺍ ﺳﭻ ﮐﺎ ﺳﻤﺎ ﺟﺎﮰ ﺗﻮ ﺳَﺮ ﻭَﺭ ﮐﯿﺎ

ﺗُﺠﮫ ﮐﻮ ﺩﯾﮑﮭﺎ ﺟﯽ ﺑﮭﺮ ﮐﮯ ﺍﻭﺭ ﺁﻧﮑﮭﯿﮟ ﭨﮭﻨﮉﯼ ﮐﺮ ﻟﯿﮟ
ﮔُﻞ ﻭُﻝ ﮐﯿﺎ، ﮔُﻠﺸﻦ ﮐﯿﺎ،____ ﺍﻭﺭ ﻣَﻨﻈﺮ ﻭَ ﻧﻈﺮ ﮐﯿﺎ

ﺯﯾﺐ ﮐﮩﻮ ﺍﻟﻠﮧ ﮐﺮﮮ ﻓِﺮﺩﻭﺱِ ﺑﺮﯾﮟ ﻣﯿﮟ ﻣﮑﺎﮞ
ﺷﻌﺮ ﻭﯾﺮ ﯾﮧ ﻏﺰﻝ ﻭﺯﻝ ﮐﯿﺎ ﻣُﻀﻄﺮ ﻭَﺿﻄﺮ ﮐﯿﺎ

اپنا لڑنا بھی محبت ھے تمھیں علم نہیں چیختی تم رھی اور میرا گلہ بیٹھ گیا

تیرا چپ رہنا میرے ذہن میں کیا بیٹھ گیا
اتنی آوازیں تجھے دیں کہ گلہ بیٹھ گیا

یوں نہیں ھے کہ میں ھی فقط اسے چاہتا ھوں
جو بھی اس پیڑ کی چھاؤں میں گیا بیٹھ گیا

اتنا میٹھا تھا وہ غصے بھرا لہجہ مت پوچھ
اس نے جس جس کو بھی جانے کا کہا بیٹھ گیا

اپنا لڑنا بھی محبت ھے تمھیں علم نہیں
چیختی تم رھی اور میرا گلہ بیٹھ گیا

اس کی مرضی وہ جسے پاس بیٹھا کے اپنے
اس پہ کیا لڑنا فلاں میری جگہ بیٹھ گیا

بات دریاؤں کی سورج کی نہ تیری ھے یہاں
دو قدم جو بھی میرے ساتھ چلا بیٹھ گیا

بزمِ جاناں میں نشستیں  نہیں  ہوتی مخصوص
جو بھی اک بار جہاں بیٹھ گیا بیٹھ گیا

اپنی تعمیر اُٹھاتے تو ، کوئی بات بھی تھی تم نے اِک عمر گنوا دی ، مری مسماری میں

اپنی مستی، کہ تِرے قُرب کی سرشاری میں
اب میں کچھ اور بھی آسان ہوں دُشواری میں

کتنی زرخیز ہے نفرت کے لیے دل کی زمیں
وقت لگتا ہی نہیں فصل کی  ، تیاری میں

اِک تعلق کو بکھرنے سے بچانے کے لیے
میرے دن رات گُزرتے ہیں  ، اداکاری میں

وہ کسی اور دوا سے مرا کرتا ہے علاج
مُبتلا ہوں میں کسی اور ہی بیماری میں

اے زمانے میں ترے اشک بھی رو لوں گا، مگر
ابھی مصرُوف ہوں خُود اپنی !    عزاداری میں

اُس کے کمرے سے اُٹھا لایا ہوں یادیں اپنی
خُود پڑا رہ گیا لیکن کسی ، !  الماری میں

اپنی تعمیر اُٹھاتے تو ، کوئی بات بھی تھی
تم نے اِک عمر گنوا دی ، مری مسماری میں

ہم اگر اور نہ کچھ دیر ، ہوا دیں، تو یہ آگ
سانس گُھٹنے سے ہی مر جائے گی چنگاری میں

تم بھی دُنیا کے نکالے ہوئے لگتے ہو ظہیرؔ
میں بھی رہتا ہوں یہیں، دل کی عملداری میں

ایسا بھی صدق و صفا کا نہیں دعویٰ ہم کو زندگی شیخ کی دستار نہیں ہے بھائی

دیکھنے کو کوئی تیار نہیں ہے بھائی
دشت بھی بے در و دیوار نہیں ہے بھائی

ایسا بھی صدق و صفا کا نہیں دعویٰ ہم کو
زندگی شیخ کی دستار نہیں ہے بھائی

پاکبازوں کی یہ بستی ہے فرشتوں کا نگر
کوئی اس شہر میں میخوار نہیں ہے بھائی

جان پیاری ہے تو بس چلتے چلے جاؤ میاں
کیوں کھڑے ہو یہ در یار نہیں ہے بھائی

عشق کرنا ہے تو چُھٹی نہیں کرنی کوئی
عشق میں ایک بھی اتوار نہیں ہے بھائی

آپ نے بھی تو کیا ہو گا کچھ اکبرؔ ورنہ
ایسی اس شوخ کی گفتار نہیں ہے بھائی

قسم رب کی تاحیات نہیں بھولیں گے ہم کہ جتنی آج تو نے ہماری کر دی

دل ہی توڑ دیا دل آزاری کر دی
تو نے بھی رقیبوں کی طرف داری کر دی

نہ پچھلوں کی ہمدردی ہے نہ آگے کوئی واقف
یہ تو نے کس موڑ پہ غداری کر دی

کس قدر بے رحمی سے پھوڑی ہیں آنکھیں
نور چھین لیا خوابوں کی مسماری کر دی

میں نے یونہی بات کی تھی بچھڑنے کی
تم نے فوراً ہی شروع عملداری کر دی

قسم رب کی تاحیات نہیں بھولیں گے ہم
کہ جتنی آج تو نے ہماری کر دی

اک غلطی ہوئی ہم سے تجھ کو چاہنے کی
اور یہ غلطی بھی ہم نے بہت بھاری کر دی

جاوید مہدی

‎سوچا ہے کتنی بار ، اُلٹ دوں یہ کائنات ‎اِس کو نئے سِرے سے' نئے خدّ و خال دوں

‎یہ آخــــــری چــراغ ،  ہَوا میں اُچھال دوں "
‎ممکن ہے' آج دل سے تجھے بھی نکال دوں

‎سوچا ہے کتنی بار ، اُلٹ دوں یہ کائنات
‎اِس کو نئے سِرے سے' نئے خدّ و خال دوں

‎تُو جو سُجھا رہا ہے ، یہ آسانیاں مجھے
‎ایسا نہ ہو کہ میں تجھے مشکِل میں ڈال دوں

‎اِتنے بھی بادشاہ نہيں ہو کہ میں تمھیں
‎دریا سے دشت ' دشت سے دریا نکال دوں

‎مدّت کے بعد آج ، کنارے پہ آیا ہوں
‎جی چاہتا ہے' نیکیاں دریا میں ڈال دوں

معلوم تھا سائے پہ گرا کرتی ہے دیوار بیٹھا نہ گیا دھوپ میں دیوار سے ہٹ کے

پہچان زیادہ نہیں دو چار سے ہٹ کے
وہ یار بھی اب رہتے ہیں اس یار سے ہٹ کے

معلوم تھا سائے پہ گرا کرتی ہے دیوار
بیٹھا نہ گیا دھوپ میں دیوار سے ہٹ کے

کھولی تھی دکاں دور کہ پہچان ہو آسان
بازار نیا کھل گیا بازار سے ہٹ کے

فرصت ہوئی ایسی کہ میسر نہیں اب کام
بیٹھا تھا ذرا کارِ لگا تار سے ہٹ کے

کس بیکسی سے داغ نے افسوس جان دی پڑھ کر ترے فراق کے اشعار مرگیا

کس نے کہا کہ داغ وفا دار مرگیا
وہ ہاتھ مل کے کہتے ہیں کیا یار مر گیا

دام بلائے عشق کی وہ کشمکش رہی
ایک اک پھڑک پھڑک کے گرفتار مرگیا

آنکھیں کھلی ہوئی پس مرگ اس لئے
جانے کوئی کہ طالب دیدار مرگیا

جس سے کیا ہے آپ نے اقرار جی گیا
جس نے سنا ہے آپ سے انکار مرگیا

کس بیکسی سے داغ نے افسوس جان دی
پڑھ کر ترے فراق کے اشعار مرگیا

دائرے چند ہیں گردش میں ازل سے جو یہاں کوئی بھی چیز ہمیشہ نہیں رہنے دیتے

کسی انسان کو اپنا نہیں رہنے دیتے
شہر ایسے ہیں کہ تنہا نہیں رہنے دیتے

دائرے چند ہیں گردش میں ازل سے جو یہاں
کوئی بھی چیز ہمیشہ نہیں رہنے دیتے

کبھی ناکام بھی ہو جاتے ہیں وہ لوگ کہ جو
واپسی کا کوئی رستہ نہیں رہنے دیتے

ان سے بچنا کہ بچھاتے ہیں پناہیں پہلے
پھر یہی لوگ کہیں کا نہیں رہنے دیتے

پہلے دیتے ہیں دلاسا کہ بہت ہے سب کچھ
اور پھر ہاتھ میں کاسہ نہیں رہنے دیتے

جس کو احساس ہو افلاک کی تنہائی کا
دیر تک اس کو اکیلا نہیں رہنے دیتے

واقعی نور لیے پھرتے ہیں سر پہ کوئی
اپنے اطراف جو سایہ نہیں رہنے دیتے

زندگی پیاری ہے لوگوں کو اگر اتنی ملال
کیوں مسیحاؤں کو زندہ نہیں رہنے دیتے

کہیں چھپائے سے چھپتا ہے لعل گدڑی میں فروغ حُسن تجھے بے نقاب کر دے گا

سُنی نہیں یہ مثل گھر کا بھیدی لنکا ڈھائے
تجھے تو دل کی خبر اضطراب کر دے گا

وہ گالیاں ہمیں دیں اور ہم دعائیں دیں
خجل انہیں یہ ہمارا جواب کر دے گا

کہیں چھپائے سے چھپتا ہے لعل گدڑی میں
فروغ حُسن تجھے بے نقاب کر دے گا 

وفا تو خاک کرے گا مرا عدو تم سے
وفا کے نام کی مٹی خراب کر دے گا

بھلائی اپنی ہے سب کی بھلائی میں بیخودؔ
کبھی ہمیں بھی خدا کامیاب کر دے گا

اگر آئے دشت میں جِھیل تو،مجھے احتیاط سے پھینکنا کہ میں برگِ خُشک ہُوں #دوستو ! مجھے تیرنا نہیں آئے گا

مِری داستانِ اَلم تو سُن ،کوئی زِلزِلہ نہیں آئے گا
مِرا مُدّعا نہیں آئے گا،تِرا تذکرہ نہیں آئے گا

کئی گھاٹیوں پہ مُحیط ہے،مِری زِندگی کی یہ رہگُزر
تِری واپسی بھی ہُوئی اگر،تجھے راستہ نہیں آئے گا

اگر آئے دشت میں جِھیل تو،مجھے احتیاط سے پھینکنا
کہ میں برگِ  خُشک ہُوں #دوستو  ! مجھے تیرنا نہیں آئے گا

کہِیں اِنتہا کی مَلامَتیں،کہِیں پتَھروں سے اَٹی چَھتَیں
تِرے شہر میں مِرے بعد  اب،  کوئی سر پِھرا نہیں آئے گا

کوئی اِنتظار کا فائدہ  مِرے یار ! بیدلِ غمزدہ
تجھے چھوڑ کر جو چلا گیا ،نہیں آئے گا،نہیں آئے گا

بیدؔل حیدری

ناصحا تجھ کو خبر کیا کہ محبت کیا ہے روز آ جاتا ہے سمجھاتا ہے یوں ہے یوں ہے

اس کا اپنا ہی کرشمہ ہے فسوں ہے یوں ہے
یوں تو کہنے کو سبھی کہتے ہیں یوں ہے یوں ہے

جیسے کوئی در دل پر ہو ستادہ کب سے
ایک سایہ نہ دروں ہے نہ بروں ہے یوں ہے

تم نے دیکھی ہی نہیں دشت وفا کی تصویر
نوک ہر خار پہ اک قطرۂ خوں ہے یوں ہے

تم محبت میں کہاں سود و زیاں لے آئے
عشق کا نام خرد ہے نہ جنوں ہے یوں ہے

اب تم آئے ہو مری جان تماشا کرنے
اب تو دریا میں تلاطم نہ سکوں ہے یوں ہے

ناصحا تجھ کو خبر کیا کہ محبت کیا ہے
روز آ جاتا ہے سمجھاتا ہے یوں ہے یوں ہے

شاعری تازہ زمانوں کی ہے معمار فرازؔ
یہ بھی اک سلسلۂ کن فیکوں ہے یوں ہے

ﻧﮕﺎﮦِ ﻗﯿﺲؔ ﺳﮯ ﺩﯾﮑﮭﻮ ، ﮨﻤﯿﺸﮧ ﻟﯿﻠﯽٰ ﮐﻮ ﺻﻨﻢ ﮐﺴﯽ ﮐﺎ ﺑﮭﯽ ﮨﻮ ، ﺑﮯ ﻣﺜﺎﻝ ﮨﻮﺗﺎ ﮨﮯ

ﻏُﺮﻭﺭِ ﺣُﺴﻦ ﻣﯿﮟ ﺷﺎﮨﯽ ﺟﻼﻝ ﮨﻮﺗﺎ ﮨﮯ
ﭘﺮﯼ ﺭُﺧﻮﮞ ﮐﺎ ﺳﺒﮭﯽ ﮐﭽﮫ ﮐﻤﺎﻝ ﮨﻮﺗﺎ ﮨﮯ

ﺗﺮﺍﺵ ﺍﯾﺴﯽ ﮐﮧ ﺭُﮐﺘﯽ ﮨﮯ ﺳﺎﻧﺲ ﺩَﮬﮍﮐﻦ ﮐﯽ
ﭘﮭﺮ ﺍُﺱ ﭘﮧ ﭼﻠﻨﺎ ﻗﯿﺎﻣﺖ ﮐﯽ ﭼﺎﻝ ﮨﻮﺗﺎ ﮨﮯ

ﻗﺴﻢ ﺧﺪﺍ ﮐﯽ ﺍﮮ ﻟﻔﻈﻮﮞ ﺳﮯ ﻣﺎﻭﺭﺍ ﻟﮍﮐﯽ
ﺑﺪﻥ ﺍﻭﺭ ﺍﯾﺴﺎ ﺑﺪﻥ ، ﺧﺎﻝ ﺧﺎﻝ ﮨﻮﺗﺎ ﮨﮯ

ﭘﻨﺎﮦ ﺑﺎﺩَﻟﻮﮞ ﻣﯿﮟ ﮈُﮬﻮﻧﮉﺗﺎ ﮨﮯ ﻣﺎﮦِ ﺗﻤﺎﻡ ﺟﻮ
ﺑﮯ ﺣﺠﺎﺏ ﻭُﮦ ﺯُﮨﺮﮦ ﺟﻤﺎﻝ ﮨﻮﺗﺎ ﮨﮯ

ﺧﺪﺍ ﮨﯽ ﺟﺎﻧﮯ ﺍُﺳﮯ ﭼﻮﻡ ﻟﯿﮟ ﺗﻮ ﭘﮭﺮ ﮐﯿﺎ ﮨﻮ
ﺟﻮ ﮔﺎﻝ ﻧﺎﻡ ﺳﮯ ﺑﻮﺳﮯ ﮐﮯ ﻻﻝ ﮨﻮﺗﺎ ﮨﮯ

ﺍَﮔﺮ ﻭُﮦ ﻟﺐ ﻧﻈﺮ ﺍٓﺋﯿﮟ ﺗﻮ ﺯُﻟﻒ ﺑﮭﯽ ﺩﯾﮑﮭﻮ
ﮨﺮ ﺍﯾﮏ ﺩﺍﻧﮯ ﭘﮧ ﻣﻮﺟﻮﺩ ﺟﺎﻝ ﮨﻮﺗﺎ ﮨﮯ

ﻧﮕﺎﮦِ ﻗﯿﺲؔ ﺳﮯ ﺩﯾﮑﮭﻮ ، ﮨﻤﯿﺸﮧ ﻟﯿﻠﯽٰ ﮐﻮ
ﺻﻨﻢ ﮐﺴﯽ ﮐﺎ ﺑﮭﯽ ﮨﻮ ، ﺑﮯ ﻣﺜﺎﻝ ﮨﻮﺗﺎ ﮨﮯ

شہزاد قیس

میں نے حالانکہ بہت وقت گزارا ہے یہاں اب میں اس شہر میں پل بھر نہیں رہنے والا

نہیں ایسا بھی کہ یکسر نہیں رہنے والا
دل میں یہ شور برابر نہیں رہنے والا

جس طرح خامشی لفظوں میں ڈھلی جاتی ہے
اس میں تاثیر کا عنصر نہیں رہنے والا

اب یہ کس شکل میں ظاہر ہو، خدا ہی جانے
رنج ایسا ہے کہ اندر نہیں رہنے والا

میں اسے چھوڑنا چاہوں بھی تو کیسے چھوڑوں؟
وہ کسی اور کا ہو کر نہیں رہنے والا

غور سے دیکھ ان آنکھوں میں نظر آتا ہے
وہ سمندر جو سمندر نہیں رہنے والا

جرم وہ کرنے کا سوچا ہے کہ بس اب کی بار
کوئی الزام مرے سر نہیں رہنے والا

میں نے حالانکہ بہت وقت گزارا ہے یہاں
اب میں اس شہر میں پل بھر نہیں رہنے والا

مصلحت لفظ پہ دو حرف نہ بھیجوں؟ جوادؔ
جب مرے ساتھ مقدر نہیں رہنے والا

داد کی بھیک نہ مانگ!! اے مرے اچھے شاعر!! جا تجھے میری دعا ہے ترا کاسہ ٹوٹے

ٹوٹنے پر کوئی آئے تو پھر ایسا ٹوٹے
کہ جسے دیکھ کے ہر دیکھنے والا ٹوٹے

تو اسے کس کے بھروسے پہ نہیں کات رہی؟؟
چرخ کو دیکھنے والی!! ترا چرخہ ٹوٹے

اپنے بکھرے ہوئے ٹکڑوں کو سمیٹے کب تک؟؟
ایک انسان کی خاطر کوئی کتنا ٹوٹے

کوئی ٹکڑا تری آنکھوں میں نہ چبھ جائے کہیں
دور ہو جا کہ مرے خواب کا شیشہ ٹوٹے

میں کسی اور کو سوچوں تو مجھے ہوش آئے
میں کسی اور کو دیکھوں تو یہ نشہ ٹوٹے

رنج ہوتا ہے تو ایسا کہ بتائے نہ بنے
جب کسی اپنے کے باعث کوئی اپنا ٹوٹے

پاس بیٹھے ہوئے یاروں کو خبر تک نہ ہوئی
ہم کسی بات پہ اس درجہ انوکھا ٹوٹے

اتنی جلدی تو سنبھلنے کی توقع نہ کرو!!
وقت ہی کتنا ہوا ہے مرا سپنا ٹوٹے

داد کی بھیک نہ مانگ!! اے مرے اچھے شاعر!!
جا تجھے میری دعا ہے ترا کاسہ ٹوٹے

ورنہ کب تک لیے پھرتا رہوں اس کو جوادؔ
کوئی صورت ہو کہ امید سے رشتہ ٹوٹے

چھین لے مجھ سے مرا عیش اور آرام سبھی مجھ کو دے دے مری" دستارِ گدائی" واپس

یار نے گال سے جب زلف ہٹائی  واپس
آنکھ چندھیا سی گئی  ،دیکھ نہ پائی واپس

کاش !میں  پھر سے کبھی چاند پہ چرخہ دیکھوں!
کاش ! لوٹ آئے کبھی "چاند کی مائی" واپس!

چھین لے مجھ سے مرا عیش اور آرام سبھی
مجھ کو دے دے مری" دستارِ گدائی" واپس

اِس میں بھی تیری ہی صحبت کا اثر ہے صاحب!
یاد کب تیری طرح لوٹ کر آئی واپس

مار اِک بار زمانے کی جس نے کھائی ہو
اُس نے پھر مار زمانے کی نہ کھائی واپس

تُو نے بس آگ لگانی تھی، تجھے کیا معلوم؟
کتنے اشکوں کے عوض  آگ بجھائی واپس

تُو نے جو جان عطا کی ہے، خدائی ہے تری
کھیل اب کر دے ختم! لے لے خدائی واپس

وصل میں ہجر کی باتوں سے کہیں بہتر ہے
مانگ لیتے ہیں علیؔ پھر سے  جدائی واپس

مجھے معلوم تھا وہ  داستاں کے آخر میں
ہاتھ سے کھینچ لے گا اپنی کلائی واپس

دیکھ لوقبر میں جی بھر کے علیؔ کا چہرہ!
اب نہ آوے گا کبھی عشق کا داعی واپس
...
علیؔ سرمد

اس زخم جان کے نام ، جو اب تک نہیں بھرا۔ اس زندہ دل کے نام ، جو اب تک نہیں مرا

اس زخم جان کے نام ، جو اب تک نہیں بھرا۔
اس زندہ دل کے نام ، جو اب تک نہیں مرا

۔

ان اہل دل کے نام ، جو راھوں کی دھول ہیں۔
ان حوصلوں کے نام جنہیں دکھ قبول ہیں ۔

اس زندگی کے نام ، گزارا نہیں جسے۔
اس قرض فن کے نام ، اتارا نہیں جسے۔

ان دوستوں کے نام ، جو گوشہ نشیں ہیں۔
ان بے حسوں کے نام ، جو یار زمین ہیں۔

ان بے دلوں کے نام ، جو ہر دم ملول ہیں۔
ان بےبسوں کے نام ، جو گملوں کے پھول ہیں۔

ان شعلہ رخ کے نام ، روشن ہے جس سے رات۔
ہے ضوفشاں اندھیرے میں ہر نقطہ کتاب۔

اس حسن باکمال کی رعنائیوں کے نام۔
اور اپنے ذہن و قلب کی تنہائیوں کے نام۔